Almannavarnir hafa ákveðið að aflétta rýmingu að hluta, frá klukkan 20 í kvöld. Hins vegar verða þau svæði sem eru næst flóðafarvegunum þ.e við Austur-Landeyjar og undir Eyjafjallajökli, áfram rýmd í nótt. Áfram verða vegir lokaðir og takmarkanir á umferð.

Víðir Reynisson, deildarstjóri almannavarna, segir að í samráði við vísindamenn og almannavarnanefndina á Hvolsvelli hafi verið tekin ákvörðun um að rýmingu verði aflétt að hluta í nágrenni við Eyjafjallajökul.

Rætt verður sérstaklega við þá íbúa sem fá ekki að fara heim til sín í nótt. Um er að ræða hluta af Austur-Landeyjum og svæði sem standa næst flóðfarvegunum. Þá verður eigendum frístundahúsa ekki leyft að vera á svæðinu.

Þeir sem fá hins vegar að fara heim til sín í kvöld eru beðnir um að vera vakandi og tilbúnir að rýma hús sín með skömmum fyrirvara á ný ef þörf krefur.

„Við verðum að gæta öryggis og leita samstarfs við íbúana á svæðinu,“ segir Víðir. „Rýmingunni verður að hluta til aflétt í kvöld þegar við erum búin að fara yfir þetta betur,“ segir hann ennfremur.