Magnús Tumi segir enn lítið vitað um gosefnin í þessu eldgosi.

Gosið sem hófst í Eyjafjallajökli í morgun telst ekki stórt gos þó það sé mun öflugra en gosið sem lauk á Fimmvörðuhálsi í gær. Staðsetning gosins uppi á toppi jökulsins gerir það þó mun hættulegra en stærðin ein gefur til kynna að mati Magnúsar Tuma Guðmundssonar jarðeðlisfræðings.

Hann segir enn ekki hægt að segja til um hvort gosið sé enn að stækka eða fari minnkandi. „Gosið er bara í gangi,“ segir hann „og mælingar benda ekki til að þetta sé stórt gos, þó það sé vissulega mun öflugra en gosið í  Fimmvörðuhálsi sem segja má að hafi verið einskonar forleikur að þessu.“

Telur Magnús Tumi að um fjórðungur af þeim ís sem er á gosstöðinni sé nú farin. „Það er því nægur ís til að það geti komið endurteknar hlaupskvettur á meðan að gosið stendur og það er helsta vandamálið við þetta gos.“ Stöðugt þurfi að vera varðbergi og raunar í mun meira mæli en í flestum þeim eldgosum sem upp hafa komið undanfarin ár og áratugi. „Þarna er bratt fjall, nálægt byggð með jökli á toppnum og það gýs í toppnum. Aðstæður hér eru þess vegna allt öðru vísi en inni í Grímsvötnum. Þar gýs lengst inni í Vatnajökli og þó að það geti komið jökulhlaup niður Skeiðarársandinn þá er enginn byggð í hættu þar.“ Aðstæður nú kalli því á stöðuga vöktun vegna hugsanlegar hlaupa.

Að sögn Magnúsar Tuma er ekki mikið vitað um gosefnin úr nýja gosinu ennþá. „Vísindamenn frá Jarðvísindastofnun munu reyna að afla sýna á morgun og koma þeim í greiningu til Reykjavíkur.“ Það geti þó verið vissum vandkvæðum háð þar sem gjóskan berist nú til austurs og þjóðvegurinn hafi verið rofinn. Vera kunni að vísindamennirnir þurfi á aðstoð Landhelgisgæslunnar til að afla sýnanna.

„Reynist gosefnið svipað og í gosinu 1821-23 þá getur það orðið langvinnt, án þess að ég sé að spá neinu um það,“ segir Magnús Tumi og vonast til að jarðvísindamenn komist einnig með flugvél Landhelgisgæslunnar í námundann við gosstöðvarnar á morgun. „Þegar ekki er bjartviðri er flugvél Landhelgisgæslunnar eina flugvélin sem er búin þeim tækjum að unnt sé að sjá í gegnum ský og átta sig á aðstæðum á gosstöðvum.“