Skráð atvinnuleysi í mars 2010 var 9,3% eða að meðaltali 15.059 manns og breytist atvinnuleysi lítið frá febrúar, fjölgar um 33 manns að meðaltali.  Á sama tíma á árinu 2009 var atvinnuleysi 8,9% eða 14.546 að meðaltali.

11,2% karla á höfuðborgarsvæðinu án vinnu

Atvinnuleysið er 9,9% á höfuðborgarsvæðinu en 8,1% á landsbyggðinni. Á höfuðborgarsvæðinu er 11,2% karla án atvinnu. Alls eru 8,3% kvenna á höfuðborgarsvæðinu án vinnu en 7,7% kvenna á landsbyggðinni eru án atvinnu.

Mest er atvinnuleysið á Suðurnesjum 14,9% en minnst á Vestfjörðum 3,2%. Atvinnuleysið er 10,2% meðal karla og 8,1% meðal kvenna, eða óbreytt frá fyrra mánuði, að því er fram kemur í frétt á vef Vinnumálastofnunar.

Alls voru 16.482 atvinnulausir í lok mars. Þeir sem voru atvinnulausir að fullu voru hins vegar 12.855, af þeim voru 3.155 í einhvers konar úrræðum á vegum Vinnumálastofnunar, auk þess sem mikill fjöldi fer í ráðgjafarviðtöl, á kynningarfundi og í vinnumiðlun. Fækkun atvinnulausra í lok mars mánaðar frá lokum febrúar nam 92, en 130 færri karlar voru á skrá en 38 fleiri konur. Á landsbyggðinni fækkar um 50 en um 42 á höfuðborgarsvæðinu.

Fjöldi þeirra sem hafa verið atvinnulausir lengur en 6 mánuði er nú 8.533 og fjölgar um 666 frá lokum febrúar og er um 52% þeirra sem eru á atvinnuleysisskrá í lok mars. Þeim sem verið hafa atvinnulausir í meira en eitt ár fjölgar úr 4.365 í lok febrúar í 4.601 í lok mars.

Alls voru 3.147 á aldrinum 16‐24 ára atvinnulausir í lok mars en 3.104 í lok febrúar eða um 19% allra atvinnulausra í mars.

Alls voru 2.421 erlendir ríkisborgarar án atvinnu í lok mars, þar af 1.428 Pólverjar eða um 59% þeirra útlendinga sem voru á skrá í lok mánaðarins. Langflestir atvinnulausra erlendra ríkisborgara voru starfandi í byggingariðnaði eða 749.

Samtals voru 2.633 af þeim sem voru skráðir atvinnulausir í lok mars í hlutastörfum, þ.e. þeir sem eru í reglubundnum hlutastörfum eða með tilfallandi eða tímabundið starf á síðasta skráningardegi í mars. Þetta eru um 16% af þeim sem voru skráðir atvinnulausir í lok mars. Af þeim 2.633 sem voru í hlutastörfum í lok mars voru 1.573 einstaklingar sem sóttu um atvinnuleysisbætur skv. lögum um minnkað starfshlutfall frá því í nóvember 2008. Í mars voru 367 sjálfstætt starfandi skráðir á atvinnuleysisskrá vegna samdráttar í rekstri skv. áður nefndum lögum. Þeim fækkar um 390 frá febrúar þegar þeir voru 757.

Spá 9-9,4% atvinnuleysi í apríl

Yfirleitt batnar atvinnuástandið frá mars til apríl. Í fyrra var undantekning þar á en þá jókst atvinnuleysið lítils háttar. Þannig jókst atvinnuleysi um 1,8% frá mars til apríl á árinu 2009. Vinnumálastofnun áætlar að atvinnuleysið í apríl breytist lítið og verði á bilinu 9%‐9,4%. Í fyrra var atvinnuleysið 9,1% í apríl.