Steingrímur J. Sigfússon, fjármálaráðherra, sagði Alþjóðagjaldeyrissjóðinn (AGS) fjalla um málefni Íslands á morgun, gangi allt að óskum. Verði af endurskoðun áætlunarinnar verið staða Íslands til muna sterkari og betri. Þetta kom fram á Alþingi í dag.

Sigmundur Davíð Gunnlaugsson, formaður Framsóknarflokksins, spurði fjármálaráðherra út í viljayfirlýsingu til AGS fyrir hönd Íslands, hverju væri í henni lofað og hvort hún hefði tiltekin kostnað í för með sér varðandi Icesave.

Steingrímur sagði að í yfirlýsingunni væri verið að árétta áframhaldandi einbeitta vilja Íslands til að leysa Icesave-málið með samningum. Samningsstaðan breytist ekki til hins verra með yfirlýsingunni. Þá sé um að ræða almenna uppfærslu á viljayfirlýsingunni, hakað sé við það sem gert hefur verið og ný viðmið sett í þeim málum sem standa út af borðinu.

Fjármálaráðherra benti á að skjalið eins og önnur tengd skjöl séu trúnaðarmál á meðan þau eru til dreifingar hjá AGS en verði gerð opinber og birt á vefsvæði sjóðsins eftir að stjórn AGS tekur Ísland fyrir.