Frá Mosfellsbæ. mbl.is/RAX

Tillaga arcihitecture.cells, alþjóðlegs nets arkitekta og hönnuða, bar sigur úr bítum í samkeppni um hönnun húsnæðis Framhaldsskólans í Mosfellsbæ, en úrslit voru kynnt í dag.

Höfundar vinningstillögunnar eru þau Aðalheiður Atladóttir, Falk Krüger og Filip Nosek. Var dómnefnd einróma á þeirri skoðun að tillagan hefði þá sérstöðu sem leitað var eftir og mælti með henni til frekari útfærslu en stefnt er að því að hönnun ljúki vorið 2011. Í umsögn dómnefndar um vinningstillöguna segir m.a. að hún sýni mjög fallega, áhugaverða og lifandi byggingu þar sem nemendur eru sýnilegir umhverfinu jafnt úti sem inni. 

Þau Katrín Jakobsdóttir mennta- og menningarmálaráðherra og Haraldur Sverrisson bæjarstjóri Mosfellsbæjar kynntu úrslitin í Hlégarði í Mosfellsbæ í dag.

Alls bárust 39 tillögur í keppnina sem að mati dómnefndar voru fjölbreyttar, frumlegar og metnaðarfullar. Dómnefnd lagði áherslu á að velja snjallar og frumlegar hugmyndir með það að meginmarkmiði að finna tillögu sem leysir viðfangsefnið í heildstæðri og vel útfærðri hönnun. Ákveðið var að veita þremur tillögum verðlaun, tveimur tillögum viðurkenningu með innkaupum og einni tillögu viðurkenninguna athyglisverð tillaga.