Spor í öskunni. mbl.is/Ómar

Ekki eru líkur á að aska berist til höfuðborgarinnar næstu daga, samkvæmt veðurspám, en Umhverfis- og samgöngusvið Reykjavíkurborgar fylgist grannt með þróun gossins í Eyjafjallajökli og hvaða áhrif mögulegt öskufall gæti haft í borginni.

Þetta segir í tilkynningu frá Uhverfis- og samgöngusviði. Þar segir ennfremur:

Drykkjarvatn: Ólíklegt er að neysluvatn Reykvíkinga spillist þótt aska berist yfir borgina. Heilbrigðiseftirlit Reykjavíkur fer með umhverfis- og matvælaeftirlit í borginni og vaktar neysluvatnið. Neysluvatn Reykvíkinga er grunnvatn, fengið í Heiðmörk af allnokkru dýpi úr miklum grunnvatnsstraumum. Fylgst er með gæðum neysluvatnsins reglulega. Flúormagn vatnsins mælist alltaf langt undir viðmiðunarmörkum. En berist aska yfir vatnsverndarsvæðið verður neysluvatnið undir auknu eftirliti í samstarfi við Orkuveitu Reykjavíkur.

Loftmengun: Viðbragðsteymi Heilbrigðiseftirlitsins fylgist með loftgæðum í borginni og mun gefa út leiðbeiningar og viðvaranir til almennings um loftmengun vegna öskufalls ef þörf krefur. Engin ástæða er til sérstakra varúðarráðstafana í Reykjavík s.s. að bera öndunargrímur utandyra nema ef um öskufall verði að ræða. Þeir sem eru með viðkvæm öndunarfæri, astma eða lungnasjúkdóma eru þar í sérstökum áhættuhópi. Fínasti hlutinn af öskunni er í formi svifryks en í Reykjavík eru þrjár mælistöðvar sem mæla svifryk og hægt er að fylgjast með niðurstöðum mælinga meðal annars á loftgæðatengli borgarinnar. Almennar leiðbeiningar eru að finna á vef Umhverfisstofnunar og Almannavarna.