Lydia Amimo Henrysdóttir frá Hveragerði hefur verið föst í London frá því á fimmtudaginn var. Ekkert flug hefur verið vegna eldgossins. Rax / Ragnar Axelsson

„Mér líður illa og ég hef verið grátandi,“ sagði Lydia Amimo Henrysdóttir frá Hveragerði. Hún hefur ekki komist heim frá London frá því á fimmtudag í síðustu viku vegna eldgossins. Lydia segist vera orðin þreytt á óvissunni. Hún átti að mæta til vinnu á Landspítalanum í dag en varð að afboða sig.

Lydia kvaðst hafa farið til London á mánudag í síðustu viku og ætlaði hún að fljúga aftur heim á fimmtudaginn var. Þegar hún mætti á flugvöllinn var henni sagt að ekkert yrði af flugi til Íslands vegna eldgossins í Eyjafjallajökli. 

Starfsmaður á flugvellinum sagði henni að hún skyldi ekki fara aftur inn í London heldur fá inni á hóteli nálægt flugvellinum og koma aftur á flugvöllinn á föstudagsmorgun. 

„Ég kom á flugvöllinn klukkan tíu um morguninn en þá var ekkert flug heldur. Ég er búin að bíða hér síðan og hringja stöðugt í Iceland Express,“ sagði Lydia. Henni var gefin von um að það yrði flogið í gær en ekkert varð af því. Lydia kvaðst hafa spurst fyrir um flug í dag en fengið sömu svör. 

„Ég er að læra að verða sjúkraliði og átti að byrja að vinna á Landspítalanum í dag. Ég varð að hringja og láta vita að ég kæmist ekki,“ sagði Lydia.

Hún á að gangast undir próf í sjúkraliðanáminu í næstu viku. Lydia kvaðst ekki hafa tekið skólabækurnar með sér í ferðina til London sem aðeins átti að taka þrjá daga.  Hún hefur því ekki getað nýtt tímann til að undirbúa sig fyrir prófin. Lydia kvaðst vona að hún kæmist sem fyrst aftur heim til Íslands.