Reuters

Icelandair mun í dag fljúga fimm flug til fjögurra Evrópuborga og tvö flug til Bandaríkjanna. Félagið segir, að röskun flugs Icelandair hafi haft áhrif á 20 þúsund farþega en tekist hafi að flúga um helming áætlunar frá því eldgosið hófst í Eyjafjallajökli síðasta miðvikudag.

Dagana 15.-20. apríl var samkvæmt áætlun Icelandair gert ráð fyrir að fljúga 136 flug. Þess í stað hefur Icelandair flogið 76 flug, eða sem svarar 56% af áætlun félagsins.

Alls hefur þessi röskun snert 20 þúsund farþega, hér á landi og erlendis sem áttu bókað flug þessa daga. Rúmur helmingur þeirra hefur komist í flug, annað hvort í sérstök aukaflug eða flug samkvæmt áætlun. Fjölmargir hafa frestað ferðum sínum eða hætt við, og aðrir eru í biðstöðu, sumir enn fastir fjarri heimahögum.

Flug til og frá Bandaríkjunum hefur verið með eðlilegum hætti, en Evrópuflug hefur farið mjög úr skorðum. Miklu hefur bjargað að á föstudag 16. apríl var unnt að fljúga 3 aukaflug til Glasgow og sunnudaginn 18. apríl var flogið fimm sinnum til Þrándheims í Noregi. Ekkert hefur hinsvegar verið unnt að fljúga til helstu áfangastaða Icelandair, þ.e. Kaupmannahafnar og London.

„Verkefni okkar undanfarna daga hefur falist í því að leita allra leiða til þess að halda uppi flugstarfsemi milli Íslands og umheimsins og  við höfum gripið öll þau tækifæri sem hafa gefist, m.a. með sérstökum aukaflugum til staða eins og Þrándheims og Glasgow, sem opnast hafa," segir Birkir Hólm Guðnason, framkvæmdastjóri Icelandair, í tilkynningu.

„Þau flug fylltust strax og þau voru sett upp og við fundum fyrir miklu þakklæti farþega, þó þeir væru ekki að fljúga á sinn áfangastað. Sérfræðingar í stjórnstöð Icelandair skoða stöðugt alla slíka valkosti því við vitum að margir hafa þurft að bíða lengi. Við höfum flugvélar okkar og starfsfólk í viðbragðsstöðu, við förum að ítrustu öryggiskröfum og um leið og yfirvöld gefa sínar heimildir þá förum við af stað til okkar áfangastaða, eða annarra flugvalla sem hugsanlega opnast fyrr."