Séð til Eyjafjallajökuls frá Hvolsvelli gegnum vefmyndavél Mílu.

Heilsugæslan í Rangárþingi hefur aukið þjónustu sína á ýmsum sviðum vegna eldsumbrotanna í Eyjafjallajökli. Búið er að opna sérstakan þjónustusíma heilsugæslunnar til að sinna líkamlegri og andlegri vanlíðan vegna eldgossins. 

Þjónusta læknis og hjúkrunarfræðings er veitt við heilsugæslustöðvarnar á Hellu (sími 480 5320) og Hvolsvelli (480 5330) á dagvinnutíma og utan þess tíma sinnir vakthafandi læknir bráðatilvikum, sími 480 5111

Búið er að opna sérstakan þjónustusíma heilsugæslunnar í Rangárþingi, sími 896 5080, vegna líkamlegrar og andlegrar vanlíðanar tengdrar eldgosi. Síminn er opinn frá klukkan 8-16 en framvísað á  síma RKÍ 1717 utan þess tíma. Í því númeri er tekið við beiðnum um þjónustu.

Í íbúamiðstöð í samkomuhúsinu Hvoli á Hvolsvelli er hægt að setjast niður, spjalla og drekka kaffi.  Þar liggja frammi upplýsingar og bæklingar vegna eldgossins og afleiðinga þess. Þar eru einnig skráðar beiðnir um frekari aðstoð.

Að Heimalandi V-Eyjafjöllum er íbúamiðstöð opin kringum hádegið og fram eftir degi.  Þar er einnig veitt tímabundið ákveðin þjónusta heilsugæslu og sálfræðiþjónusta en upplýsingar um nánari viðverutíma eru veittar á staðnum og hjá Heilsugæslu Rangárþings.

Skólasálfræðingar hafa veitt starfsfólki grunnskóla og leikskóla fræðslu vegna einkenna um streitu og álag hjá börnum. Fyrst um sinn verður aukin viðvera skólahjúkrunarfræðings við grunnskólann á Hvolsvelli.

Stofnaður hefur verið samræmingarhópur vegna sálfélagslegs stuðnings í Rangárvallasýslu með aðkomu heilsugæslunnar, þjóðkirkjunnar, RKÍ og Félagsþjónustu Rangárvallasýslu og V-Skaftafellssýslu.

Viðbrögð í Rangárvallasýslu eru skipulögð í náinni samvinnu við
sveitarstjórnir, viðbragðsaðila og heimamenn. Heilsugæslan hefur góða samvinnu bæði við áfallateymi landlæknis og Landspítalans sem og áfallateymi RKÍ.

Náið samstarf er við Almannavarnir ríkisins og Almannavarnanefnd
Rangárvallasýslu og V-Skaftafellssýslu.