Þyrla Landhelgisgæslunnar var í nótt flutt til Akureyrar vegna yfirvofandi lokunar Reykjavíkurflugvallar. mbl.is/Árni Sæberg

Slökkvilið Akureyrar mun auka viðbúnað sinn á Akureyrarflugvelli frá og með í dag vegna lokunar Keflavíkur- og Reykjavíkurflugvallar. Keflavíkurflugvöllur lokaðist klukkan 6 í morgun vegna öskuskýs frá Eyjafjallajökli en bæði Icelandair og Iceland Express flýttu morgunflugum sínum vegna þessa.  Reykjavíkurflugvöllur er einnig lokaður.

Þar sem óhagstæðar vindáttir eru taldar geta borið ösku frá gosstöðvunum í Eyjafjallajökli til Reykjavíkur og Keflavíkur er búist við að millilandaflug fari um Akureyrarflugvöll í staðinn.

Vegna þessa bætir slökkvilið Akureyrar við slökkvibifreið á flugvöllinum ásamt mannskap meðan þetta ástand varir. Að sögn Þorbjörns Haraldssonar slökkviliðsstjóra samræma liðið og Flugstoðir öryggi vallarins í takt við þær breytingar og áætlanir sem eru í sífeldri endurskoðun miðað við veðurspár.

Guðjón Arngrímsson, upplýsingafulltrúi Icelandair, sagði að gert væri ráð fyrir að lokun Kéflavíkurflugvallar hefði áhrif á 40 áætlunarflug í dag. Þar af yrðu 24 flug felld niður, 12 nýjum komið á vegna lokunarinnar og fjórum ferðum flýtt til að tryggja að flugvélar kæmust í loftið áður en flugumferð yrði takmörkuð.

Óttast var að gjóskan myndi einnig setja verulegt strik í reikninginn hjá Iceland Express (IE). Matthías Imsland, forstjóri IE, sagði að flugi til London frá Keflavík yrði flýtt og einnig flugi frá Alicante til að hægt yrði að fara fyrr til Kaupmannahafnar en áætlað hafði verið. Verið var að skoða hvernig leyst yrði úr Berlínarflugi. Þá var í skoðun að beina flugvélum IE á leið frá Kaupmannahöfn og London til Akureyrar.

Aðspurður hvað röskunin hefði áhrif á ferðir margra farþega Icelandair taldi Guðjón að þeir væru ríflega 4.000. Matthías Imsland taldi að niðurfelling á flugi til og frá Berlín myndi hafa áhrif á ferðir 300 farþega.

Hvað snertir beint fjárhagslegt tjón félaganna af völdum gossins taldi Guðjón óhætt að áætla að það nálgaðist milljarð hjá Icelandair.

Að sögn Matthíasar nemur tjón Iceland Express nú þegar 150-200 milljónum. Hann óttaðist að tugir milljóna bættust við ef tafir yrðu á flugi fram á laugardag.

Á Íslandi eru fjórir alþjóðaflugvellir, í Keflavík, Reykjavík, á Akureyri og Egilsstöðum.