Eldgosið í Eyjafjallajökli er aðalumfjöllunarefni kanadíska tímaritsins Maclean's.

Kanadíska tímaritið Maclean's fjallar í dag í löngu máli um eldgosið í Eyjafjallajökli , áhrif þess og afleiðingar eða eins og blaðamaður orðar það sjálfur, um „eldfjallið sem kæfði Evrópu".

Í greininni er meðal annars sagt að Eyjafjallajökull hafi opnað augu fólks fyrir því hversu háð við erum orðin ódýrum og fljótlegum flugsamgöngum, því um allan heim hafi fólk þurft að sætta sig við lamandi áhrif eldgossins, jafnt blómabændur og ávaxtaframleiðendur sem kvikmyndastjörnur, æðstu þjóðhöfðingjar og jafnvel heilu fótboltaliðin.

Blaðamaður Maclean's rifjar upp að eftir þekkt dæmi um alvarlegar afleiðingar ösku úr eldfjöllum á 9. áratugnum, s.s. þegar stórar farþegaflugvélar misstu afl annars vegar yfir Indónesíu árið 1982 og hinsvegar yfir Alaska 1989, þá hafi verið talin full ástæða til að setja á alþjóðlegt viðbúnaðarkerfi í flugumferð vegna öskuskýja.   Haft er eftir Richard Houges, yfirmanni ráðgjafarstofu vegna ösku í Kanada, að aðeins lítið magn af ösku geti valdið milljóna dollara tjóni á vélbúnaði flugvéla.

Einnig er bent á í greininni að eldgosið í Eyjafjallajökli hafi þrátt fyrir allt verið heldur smátt og aðeins spúið 2.700 tonn af brennisteinsdíoxíði á dag.  Til samanburðar hafi t.d. eldfjallið Pinatubo á Filippseyjum spúið 18 milljónum tonna á dag þegar það gaus árið 1991 og þannig haft áhrif á heilu veðurkerfin og kælt andrúmsloft jarðar um 0,6°C í heilt ár. Eyjafjallajökull dreifi hinsvegar öskunni svo víða vegna þess að gosið sé undir jökli og vatnsgufan beri öskuna lengra.

Tímaritið segir að það furðulega sé í raun ekki hversu miklum vanda Eyjafjallajökull hafi valdið, heldur frekar að þetta skuli ekki gerast oftar, því eldfjöll undir jöklum sé að finna víða allt frá Japan til Alaska. Á Íslandi einu saman hafi 33 eldfjöll gosið frá lokum síðustu ísaldar og hvert og eitt þeirra hafi fulla burði til að valda sambærilegum, ef ekki meiri, töfum á flugsamgöngum.