Mökkinn leggur nú til norðurs frá Eyjafjallajökli, eins og sést í vefmyndavél Mílu á Hvolsvelli. eldgos.mila.is

Öskufall varð í Fljótsdal, innst í Fljótshlíð, í morgun. Anna Runólfsdóttir, bóndi, sagði að óþægilegt væri að vera úti nema með rykgrímu og hlífðargleraugu. Hún sagði öskuna ákaflega fíngerða. Að sögn lögreglunnar á Hvolsvelli hefur orðið var þar við fíngert ryk, sem líklega er aska. 

Anna í Fljótsdal sagði að öskufalls hafi gætt um stund í morgun. Askan fauk til jafnóðum og hún féll og sagði Anna að sjá mætti ösku í öllum grópum.

„Það skrýtna er að hjá okkur var hávaða austanátt í allan dag en mökkurinn stefndi beint í norður fyrir ofan okkur. Þar náði að rigna úr honum niður á okkur,“ sagði Anna.

Askan sást ekki fyrr en hún birtist á stéttinni og á diski sem þau í Fljótsdal settu út. Anna sagði að askan sé ákaflega fíngerð og hún sé í loftinu. Þægilegra sé að vera með rykgrímu utandyra og að hlífa augunum. „Þótt þetta sé ekki mikið þá er þetta óþægilegt,“ sagði Anna.

„Þetta er afskaplega fínn salli. Það sem maður nær að safna í lófann er eins og púður ef maður þreifar á því. Það er erfitt að finna fyrir þessu nema á milli tannanna. Þetta er svo fínlegt.“

Nú rýkur ekki mikið af aurunum þar sem flóðið úr Gígjökli hljóp fram á dögunum. Anna taldi að blotnað hafi í framburðinum og að hann muni rjúka síðar þegar þornar um.

Margar ær eru nú bornar í Fljótsdal. Nokkrar ær voru úti í morgun til að hafa rýmra um fé í fjárhúsunum. Um leið og vart varð við öskufall voru kindurnar teknar inn.

Hreinsun gengur vel

Lögreglan á Hvolsvelli sagði að dælubílar slökkviliða hafi verið notaðir við hreinsun á bæjum undir Eyjafjöllum í allan dag og reynst mjög vel. Mjólkurbílar hafa flutt vatn í dælubílana til að nýta þá betur.