Einmana flugbrautir á Keflavíkurflugvelli. Reuters

Öskuskýið frá Eyjafjallajökli heldur enn flugfarþegum og flugfélögum í óvissu. Millilandaflug hefur legið niðri á Keflavíkurflugvelli í dag. Flugstoðir hafa greint frá því að vellirnir í Keflavík og Reykjavík verði lokaðir til kl. 13. Nýjar upplýsingar um öskudreifingu eru væntanlegar um hádegisbil.

Þá ræðst hvort hægt verður að hefja áætlunarflug frá Keflavík í dag. Flugfélögin endurskipuleggja flugáætlanir sínar eftir því sem upplýsingar um öskudreifingu berast, að því er fram kemur á vef Keflavíkurflugvallar. Þeir farþegar sem eiga bókað flug í dag geta átt von á því að þurfa að fara norður til Akureyrar til að komast í flug, verði áfram lokað í Keflavík.

Fram kemur á vef Flugstoða að vonast sé til þess að Reykjavíkurflugvöllur muni opnast fyrir flugumferð síðdegis í dag. 

Þá er tekið fram að vellirnir á Akureyri og á Egilsstöðum séu ekki innan gjóskudreifingarsvæðis og því opnir fyrir allri umferð. Það verði þeir að öllum líkindum áfram næsta sólarhring.

Farþegar eru hvattir til þess að fylgjast vel með komu- og brottfarartímum og stöðum á vefsíðum Keflavíkurflugvallar og flugfélaganna þar sem breytingar geta orðið með skömmum fyrirvara.

Spáð er austan- og norðaustanátt í dag og áframhaldandi rigningu á Suðurlandi.  Gosmökkinn leggur því í vestur og suðvestur af eldstöðinni.  Aska er vel merkjanleg á bílum á Hvolsvelli í dag og gætir aðeins á Hellu.

Upplýsingar á komur og brottfarir á vef Keflavíkurflugvallar.