Mynd Profilm frumsýnd í Bandaríkjunum
Eldgosið séð frá Vestmannaeyjum. mbl.is./Borkir Högnason
Kvikmyndagerðin Profilm tók heimildakvikmynd um eldgosin á Fimmvörðuhálsi og í Eyjafjallajökli og jökulhlaupið úr Gígjökli. Myndin verður sýnd í þáttaröðinni Naked Science (Nakin vísindi) og frumsýnd á besta sýningartíma hjá National Geographic í Bandaríkjunum annað kvöld.
Anna Dís Ólafsdóttir, yfirframleiðandi Profilm, er nú í Salt Lake City í Utah í Bandaríkjunum ásamt Jóhanni Sigfússyni, leikstjóra myndarinnar, þar sem verið er að klippa heimilda myndina og ganga frá henni til sýningar á vegum National Geographic.
„Við vorum drifin hingað út með sólarhringsfyrirvara. National Geographic ákvað að setja myndina á dagskrá með aðeins tveggja vikna fyrirvara,“ sagði Anna Dís.
„Það var ákveðið að klippa þetta hér úti og erum að vinna myndina með eftirvinnslufyrirtæki hér í Bandaríkjunum. Tíminn var afskaplega skammur og við höfðum minna en tvær vikur til að gera klukkutíma langa kvikmynd. Það þykir ekki mikið,“ sagði Anna Dís.
Mikill áhugi fyrir myndinni og Íslandi í Bandaríkjunum
Þau Anna Dís og Jóhann hafa lagt dag við nótt við að ljúka við kvikmyndina. Myndin verður síðan send um gervihnött til höfuðstöðva National Geographic í Washington D.C. því ekki gefst tími til að senda hana á spólu. Anna Dís sagði að það væri sjaldgæft að National Geographic gerði myndir með svo skömmum fyrirvara.
Anna Dís sagði það ekki algengt að National Geographic sýni myndir um samtímaatburði. Starfsmaður stöðvarinnar sagði m.a. við hana að eitthvað líkt þessu hafi aldrei áður gerst hjá National Geographic.
Hún sagði að starfsmenn sjónvarpsstöðvarinnar séu mjög spenntir fyrir sýningu myndarinnar. Myndin hefur einnig vakið mikinn áhuga og umtal.
„Jóhann veitir 24 viðtöl við hina og þessa fjölmiðla hér í Bandaríkjunum í dag og á morgun. Þetta fær mikla umfjöllun hér. Hann talar bara um Ísland og líka að það sé alveg óhætt að fara til Íslands. Það er gott að geta gert eitthvað jákvætt,“ sagði Anna Dís.
Þau hjá Profilm höfðu haft samband við National Geographic áður en gosið braust út á Fimmvörðuhálsi og voru búin að safna talsverðu myndefni. Þegar gosið braust út var ákveðið að gera heimildarkvikmynd. „Þetta er svolítið magnað,“ sagði Anna Dís.
Þegar þau Jóhann komu heim á hótel í gærkvöldi, eftir 14 stunda vinnudag, kveiktu þau á sjónvarpinu og að sjálfsögðu á National Geographic. „Þá sáum við kynningarmyndina okkar sem er sýnd þrisvar á klukkustund,“ sagði Anna Dís.
Heimildarmyndin um eldgosið verður frumsýnd í Bandaríkjunum og á öðrum enskumælandi svæðum annað kvöld. Myndin verður sýnd á öðrum málsvæðum í maí samkvæmt heimildum Önnu Dísar.
Profilm er í raun að gera tvær heimildamyndir fyrir National Geographic um eldgosin og jarðfræði Íslands. Sú fyrri verður frumsýnd annað kvöld, eins og fyrr segir, og sú síðari líklega eftir um fjóra mánuði. Í seinni myndinni verður meira fjallað um jarðfræði Íslands í víðara samhengi en því sem tengist eldgosunum tveimur.
Vinna mikið fyrir erlendar sjónvarpsstöðvar
Hinrik Ólafsson, framleiðandi hjá Profilm, sagði að Profilm hafi tekið allt myndefnið og sett það síðan í hendur National Geographic sem setji myndina saman. Hinrik taldi að þetta sé í fyrsta skipti sem heimildarmynd tekin af Íslendingum sé frumsýnd á besta sýningartíma hjá National Geographic.
„Við vinnum mikið við að taka á móti erlendum sjónvarpsstöðvum og að skipuleggja fyrir þær tökur hér á landi. Þá koma þær með sitt eigið tökulið. Við tökum líka mikið fyrir erlendar sjónvarpsstöðvar og höfum selt þeim efni.
Þar á meðal er kvikmynd sem verður sýnd á fjölda sjónvarpsstöðva á þessu ári og heitir „Living on the Edge“ (Lifað á brúninni). Hún var tekin hér á landi og fjallar um náttúruöflin hér og samskipti fólksins við þau og það sem Ísland gefur af sér. Jarðhitann, fiskinn og aðrar auðlindir Íslands,“ sagði Hinrik.
Anna Dís Ólafsdóttir er yfirframleiðandi Profilm. Brynjar Gauti
Hinrik Ólafsson hjá Profilm. Profilm.is
