Ásdís Ásgeirsdóttir

Hæstiréttur hefur staðfest úrskurð Héraðsdóms Reykjaness um að gæsluvarðhald yfir konu, sem grunuð er um mansal og vændisstarfsemi, verði framlengt til 4. júní. Héraðsdómur hafði áður fallist á kröfu lögreglu um að framlengja gæsluvarðhaldið til 21. maí en Hæstiréttur stytti þann tíma.

Konan, sem heitir Catalina Mikue Ncogo, var 1. desember dæmd í 2½ árs fangelsi í Héraðsdómi Reykjaness fyrir innflutning fíkniefna og hagnýtingu vændis. Catalina hefur áfrýjað þeim dómi til Hæstaréttar. Tveimur dögum síðar var Catalina  handtekin vegna gruns um mansal og hagnýtingu vændis en lögreglan taldi sig hafa rökstuddan grun um að Catalina flytti stúlkur til landsins, gerði þær út til vændis og tæki a.m.k. helming hagnaðarins af þeim. 

Lögregla segir, að við rannsókn málsins hafi konur borið um að hafa stundað vændi hér á landi á vegum Catalinu og að þær hafi komið til landsins í því skyni. Konunum beri saman um að Catalina hafi verið umráðamaður þess húsnæðis, sem þær dvöldu í og vændið væri stundað í, haft alla milligöngu við þá, sem keyptu vændisþjónustu og tekið við greiðslu og haldið eftir verulegum hluta þess sem greitt var.

Framkomnir vitnisburðir bendi einnig til þess að Catalina hafi gerst sek um mansal gagnvart sumum þeirra kvenna, sem um ræðir, með því að beita ótilhlýðilegri aðferð, ofbeldi, hótunum um ofbeldi og frelsissviptingu.

Fjármál Catalinu hafi verið til skoðunar hjá lögreglunni samhliða og í tilefni af framangreindri rannsókn. Hafi komið í ljós að helsta tekjulind hennar hafi verið umrædd vændisstarfsemi.