Frá fundi bæjarstjórnar Álftaness. Heiðar Kristjánsson

Fyrrverandi bæjarstjóri Álftanes var á bæjarstjórnarfundi í gær sakaður um brot á sveitarstjórnarlögum með því að stofna til lántöku án samþykkis bæjarráðs og bæjarstjórnar. Ásökununum var vísað á bug og þær sagðar tilraun til að slá pólitískar keilur.

Kristinn Guðlaugsson, forseti bæjarstjórnar, og Margrét Jónsdóttir, formaður bæjarráðs, óskuðu nýverið eftir upplýsingum um lánasamning gerðan 19. júní á síðasta ári, af Sigurði Magnússyni, þáverandi bæjarstjóra og núverandi bæjarfulltrúa.

Minnisblað vegna lánveitingarinnar var lagt fram á bæjarstjórnarfundi í gær og létu þá Kristinn og Margrét bóka: „Við teljum samkvæmt minnisblaði bæjarstjóra að fyrrverandi bæjarstjóri hafi gerst brotlegur við sveitarstjórnarlög nr. 45/1998 (55. gr. og 64. gr.). Þar sem stofnað var til lántöku án samþykkis bæjarráðs og/eða bæjarstjórnar eins og lög gera ráð fyrir.“

Fulltrúar Sjálfstæðislfokks í bæjarstjórn, Guðmundur G. Gunnarsson og Sigríður Rósa Magnúsdóttir, tóku undir bókunina.

Lántakan kynnt í bæjarráði

Sigurður Magnússon og Kristín Fjóla Bergþórsdóttir, fulltrúar Á-lista, sögðu að um tilraun til að slá pólístískar keilur væri að ræða. Í bókun þeirra vegna málsins segir m.a.: „Bæjarráð samþykkti samhljóða á fundi sínum 9. október 2008, eftir efnahagshrunið, heimild til bæjarstjóra til að leita lántöku vegna þessara framkvæmda og hafa þær í forgangi. Lántakan við viðskiptabanka sveitarfélagsins var kynnt bæjarráði.“

Fulltrúar Á-lista sögðu ásakanirnar einnig ómálefnalegar og bentu á að veturinn og vorið 2009 voru gerðar margvíslegar samþykktir í bæjarráði og bæjarstjórn þar sem bæjarstjóra var falið að koma framkvæmdum á miðsvæðinu af stað, en um það snýst lánveitingin.