Héraðsdómur Reykjaness. Ómar Óskarsson

Mennirnir tveir sem réðust á eldri hjón og dóttur þeirra í Reykjanesbæ á sunnudagskvöld voru í dag úrskurðaðir í vikulangt gæsluvarðhald. Mennirnir voru báðir dæmdir til fangelsisvistar í október síðastliðnum fyrir aðild að húsbroti, ráni og frelsissviptingu. Það mál bíður meðferðar Hæstaréttar.

Að sögn lögreglunnar á Suðurnesjum er málið litið afar alvarlegum augum en mennirnir, sem alloft hafa komið við sögu lögreglunnar áður, gengu í skrokk á hjónum á sjötugsaldri og dóttur þeirra. Árásin átti sér stað snemma kvölds fyrir utan heimili hjónanna í Reykjanesbæ.

Ljóst þykir að fólkið átti ekkert sökótt við mennina og þeim mun óljósara er hvers vegna þeir lögðu til atlögu. Þó er hugsanlegt að þeir hafi átt eitthvað vantalað við íbúa í sama húsi og hjónin búa í og hafi af þeim sökum veist að þeim. Mögulega tengist árásin handrukkun.

Önnur fólskuleg árás í maí á síðasta ári

Samkvæmt heimildum fréttavefs Morgunblaðsins, mbl.is, er um að ræða sömu menn og dæmdir voru til fangelsisvistar í Héraðsdómi Reykjavíkur í október sl. fyrir aðild að innbroti á heimili úrsmiðs við Barðaströnd á Seltjarnarnesi í maí á síðasta ári. Annar þeirra hlaut tveggja ára fangelsisdóm og hinn tuttugu mánaða dóm. Báðir áfrýjuðu þeir og bíður mál þeirra meðferðar Hæstaréttar.

Tveir til viðbótar voru dæmdir í málinu en allir voru þeir sakfelldir fyrir aðild sína. Tveir mannanna, m.a. annar sem situr í nú gæsluvarðhaldi, tóku beinan þátt í innbrotinu og réðust á húsráðanda, börðu hann og bundu þegar hann kom að þeim. Húsráðandinn er fæddur 1935.