Sverrir Vilhelmsson

Hæstiréttur hefur dæmt 36 ára gamlan karlmann, Benjamín Þór Þorgrímsson, í 2 ára fangelsi fyrir þrjár líkamsárásir, þar á meðal árás, sem sýnd var í fréttaskýringarþættinum Kompási fyrir tveimur árum. Vísar Hæstiréttur m.a. til þess að maðurinn hafi verið dæmdur í 2 ára fangelsi fyrir nauðgun árið 1992.

Héraðsdómur Reykjavíkur hafði áður dæmt manninn í 14 mánaða fangelsi fyrir árásirnar en Hæstiréttur þyngdi refsinguna með vísan til eldri dóms fyrir ofbeldisbrot. 

Benjamín Þór var ákærður fyrir að hafa ráðist á annan mann, snúið hann í jörðina og sparkað í höfuð hans, með þeim afleiðingum að hann hlaut brot í vinstri augntóft og marðist.

Þá var hann sakfelldur fyrir að ráðast á tvo aðra menn. Segir Hæstiréttur að árásin á annan þessara manna hafi verið sérstaklega hættuleg, þar sem Benjamín reyndi ítrekað að sparka í höfuð mannsins þar sem hann lá í jörðinni.

Hæstiréttur fellst ekki á þá málsvörn Benjamíns að hinn maðurinn hafi verið tálbeita, sem notuð var til að egna hann í gildru og að starfsmenn Kompáss hefðu egnt gildruna. Ekki hefði annað fram komið í málinu en að framganga fréttamannanna hefði einungis verið fólgin í því að kvikmynda þá atburði er áttu sér stað.

Hæstiréttur segist við ákvörðun refsingar líta til þess að Benjamín Þór sé sakfelldur fyrir þrjár tilefnislausar líkamsárásir, en tvær þeirra hefðu verið fólskulegar og hættulegar. Hann ætti sér engar málsbætur.