mbl.is/Golli

Kjararáð hefur leitað til fjármálaráðuneytisins varðandi launakjör stjórnenda dótturfélaga Landsbankans. Óskar kjararáð eftir því við ráðuneytið að það segi til um hvort ráðið eigi úrskurðarvald varðandi laun og starfskjör framkvæmdastjóra hlutafélaga, sem eru að meiri hluta í eigu ríkisins og félaga sem eru að meiri hluta í eigu þeirra (dótturfélög), líkt og segir í lögum um kjararáð.

Ákvæðið tekur þó ekki til félags sem nefnt er dótturfélag móðurfélagsins í 2. mgr. 2. gr. laga um hlutafélög og 2. mgr. 2. gr. laga um einkahlutafélög, þ.e. til félaga sem eru í meirihlutaeigu dótturfélaga félaga sem eru að meirihluta í eigu ríkissjóðs.

Ákvæðið tekur ekki heldur til félaga sem viðskiptabankar, sparisjóðir og lánafyrirtæki í meirihlutaeigu ríkisins eða dótturfélög þessara fjármálafyrirtækja yfirtaka til að tryggja fullnustu kröfu. Þá segir að í vafatilvikum úrskurði fjármálaráðuneyti um hvort kjararáð eigi úrskurðarvald samkvæmt málsgreininni.

Kjararáð óskaði eftir lista yfir dótturfélög með tölvupósti til fjármálaráðuneytisins 6. október 2009 og barst endanlegur listi kjararáði með tölvubréfi 26. janúar 2010.

Á listanum voru meðal annars eftirtalin dótturfélög Landsbankans (NBI hf.): Landsvaki hf., SP fjármögnun hf., Horn fjárfestingarfélag ehf., Vestia ehf. og Reginn ehf. Kjararáð hefur unnið að undirbúningi úrskurða um launakjör framkvæmdastjóra þessara félaga. Var þeim og stjórnum félaganna skrifað 1. febrúar 2010 og gefinn kostur á að koma sjónarmiðum á framfæri við ráðið auk þess sem óskað var eftir ítarlegum upplýsingum um öll núverandi starfskjör framkvæmdastjórans, þ.m.t. hlunnindi.

Auk þess var óskað eftir upplýsingum um launuð aukastörf og starfsemi fyrirtækisins. Bréf með umbeðnum upplýsingum og sjónarmiðum stjórna félaganna bárust með bréfum dagsettum 12. mars 2010. Framkvæmdastjórar félaganna nýttu sér ekki rétt sinn til þess að koma sjónarmiðum sínum á framfæri.

Sjá nánar hér