Ráðhús Reykjavíkur. mbl.is/Júlíus

Reykjavíkurborg tapaði í dag þremur málum sem höfðuð voru af þremur fyrirtækjum, Vídd, Eirvík og Búgarði Invest. Féllst dómari við Héraðsdóm Reykjavíkur á það að tvö fyrirtækjanna fengju að skila lóðum sem þau höfðu fengið úthlutað. Reykjavíkurborg þarf að greiða þriðja fyrirtækinu, Búgarði,  tæpar 93 milljónir króna sem fyrirtækið hafði greitt til Reykjavíkurborgar.

Í öllum tilvikum var um lóðir við Lambahagaveg að ræða.

Búgarður hafði greitt fyrir lóðina sem fyrirtækið fékk úthlutað á árinu 2007. Haustið 2008 taldi fyrirtækið tvísýnt að það gæti nýtt lóðina vegna breyttra aðstæðna á lánsfjármörkuðum og í efnahagshorfum. Fékk fyrirtækið þau svör frá Reykjavíkurborg að ekki væri hægt að skila atvinnulóðum. Í október 2008 tilkynnti Búgarður formlega um skil á lóðinni  og fór fram á að fá byggingaréttar- og gatnagerðagjöld endurgreidd. Var beiðnin ítrekuð í desember saman ár. 

Í febrúar 2009 var fyrirtækinu tilkynnt um að beiðni þess um að skila lóðinni hafi verið hafnað. Lóðin sem um ræðir er ein af þrettán lóðum sem var úthlutað á þessu svæði en Bauhaus fékk fyrstu lóðina við Lambahagaveg. Einn þáði ekki úthlutunina en aðrir hafi greitt tilskilin lóðagjöld. Fjórir lóðahafar óskuðu eftir því að skila lóðunum fyrir mánaðamótin september / október 2008 og var samþykkt að taka við þeim lóðum. 

Sjö hafi óskað eftir það að fá að skila lóðum en fengið synjun.

Tvö þessara fyrirtækja, Vídd og Eirvík, höfðuðu mál gegn Reykjavíkurborg og eins og áður sagði þá féllst Héraðsdómur Reykjavíkur á kröfu þeirra.