Eldgosið í Eyjafjallajökli mbl.is/Árni Sæberg

Icelandair gera breytingar á flugi síðdegis á morgun vegna óvissu um hvort Keflavíkurflugvöllur verður opinn fyrir flugumferð á þeim tíma. Flug til og frá Keflavíkurflugvelli í fyrramálið er óbreytt og samkvæmt áætlun. Fram á laugardagskvöld eru einkum líkur á öskufalli til austurs og suðausturs frá eldstöðinni í Eyjafjallajökli.

Helstu breytingar á áætlunum Icelandair eru eftirfarandi:

Tveimur síðdegisflugum, flug FI 216/217 til/frá Kaupmannahafnar og FI 454/455 til/frá London hefur verið aflýst.

Flugi frá Kaupmannahöfn, Osló, Stokkhólmi, London, Amsterdam og Manchester/Glasgow til Íslands sem átti að koma til Keflavíkurflugvallar á bilinu kl. 15 til 16 síðdegis á morgun verður beint til Glasgow. Nýtt flug frá Glasgow til Akureyrar fyrir þá farþega sem  eru á leið til Íslands frá þessum borgum síðdegis verður sett upp og er koma þess til Akureyrar áætluð kl. 18:30.

Flug síðdegis á morgun til Boston, New York og Seattle verður frá Glasgow í stað Keflavíkurflugvallar. Nýtt flug, milli Keflavíkurflugvallar og Glasgow verður sett upp, klukkan 10.00 í fyrramálið  fyrir þá sem eru á leið til Bandaríkjanna og því er í raun brottför flugsins vestur um haf flýtt um u.þ.b. fimm klukkustundir vegna óvissunnar.

„Staðan er óljós, en töluverðar líkur eru á að Keflavíkurflugvöllur verði lokaður á þessum tíma síðdegis á morgun. Því teljum við rétt að tilkynna breytinguna með þessum fyrirvara, því það er farþegum mikilvægt að geta gert viðeigandi ráðstafanir í tíma", segir Guðjón Arngrímsson, upplýsingafulltrúi Icelandair, í fréttatilkynningu.