Störf lögreglumanna geta stundum verið varasöm þótt ekki slái í brýnu. mbl.is/Júlíus

Lögreglan á Blönduósi handtók ökumann um klukkan tvö síðustu nótt, aðfaranótt laugardags, fyrir akstur undir áhrifum fíkniefna. Þar að auki hafði maðurinn, sem var á leið frá Reykjavík til Akureyrar, um það bil tvö grömm af amfetamíni í fórum sínum.

Maðurinn veitti ekki mótspyrnu þegar hann var handtekinn en við leit í bílnum fannst risastór hnífur á milli framsætanna, sem ökumaðurinn hafði haft við höndina á meðan lögreglumenn ræddu við hann.

Maðurinn fékk að gista fangageymslur í nótt og var yfirheyrður í morgun og síðan sleppt úr haldi. Við yfirheyrslur gaf maðurinn þá skýringu á hnífnum, sem var á stærð við allra stærstu búrhnífa, að hann hefði haft hann til sjálfsvarnar ef einhverjum hefði dottið í hug að ráðast á hann. Hefði það gerst hefði hann beitt hnífnum óspart.

Vel er þekkt að neysla amfetamíns getur valdið ofsóknaræði hjá þeim sem þess neytir og því má ætla að maðurinn hafi verið hættulegur, þó hann hafi, sem fyrr segir, ekki veitt lögreglu neina mótspyrnu þegar hann var handtekinn. Málið telst upplýst.