ABC Barnahjálp og Landhelgisgæslunni hafa nú borist myndir og innilegt þakklæti frá skóla ABC barnahjálpar í Senegal. Þetta kemur fram í fréttatilkynningu frá Landhelgisgæslunni.

Varðskipið Ægir kom til Dakar í Senegal að morgni 4. maí eftir siglingu frá Las Palmas, en skipið lagði af stað 20. apríl sl. Áður en Ægir sigldi frá Íslandi bauð Landhelgisgæslan ABC Barnahjálp að senda ýmsar vörur með skipinu til Dakar, fyrir skóla sem þar er rekinn af samtökunum.

Í framhaldinu fór af stað söfnun hér á landi sem tókst, að sögn aðstandenda, afar vel. Um borð í Ægi var 20 feta gámur á dekkinu sem fullur var af ýmsum vörum fyrir samtökin.

Við komina til Dakar komu fulltrúar ABC í skoðunarferð um skipið, einnig var með í för liðsforingi frá Senegalska sjóhernum en Landhelgisgæslan er með aðstöðu á svæði þeirra við höfnina í Dakar.

Síðdegis sama dag komu starfsmenn ABC Barnahjálpar með tvo bíla fyrir vörurnar Mun áhöfn Ægis hafa haft orð á að það hefði verið aðdáunarvert að fylgjast með Senegölunum raða búnaðinum í bílana, sem áður fyllti 20 feta gám.

Áhöfn Ægis losaði gáminn og kom vörunum fyrir á bryggjunni þar sem Senegalarnir tóku við í púslinu. Héldu mjög ánægðir ABC aðilar til síns heima og var áhöfn Ægis einnig mjög sátt eftir verkefni dagsins.

Fjöldi íslenskra fyrirtækja lagði söfnuninni lið eins og sjá má hér á vef ABC Barnahjálparinnar.

Meðal þess sem sent var út var pappír, bolir, stílabækur, pennar, hreinsivörur, fótboltar, töskur, íþróttafatnaður, barnabækur á frönsku, spil, notuð skólaborð og hillur, sápa og tannkrem, reiðhjól og heimasaumaðar dúkkur.

Í tilkynningu Landhelgisgæslunnar kemur fram að gleðilegt hafi verið að sjá hvernig kynningarefni fyrrum banka hefur öðlast nýtt líf hjá börnum í Senegal.