Fyllan úr Bjarnarey hefur myndað tanga þar sem áður var þverhnípt í sjó fram. Ljósmynd/Gunnlaugur Erlendsson

„Þetta var mjög tilkomumikið. Ég sá bergið klofna við efstu brún og falla svo niður áttatíu til hundrað metra niður. Því fylgdi síðan mikil gusa,“ segir Haraldur Sverrisson skipstjóri á Sporði VE. Hann var vitni að því þegar mikil fylla féll úr NA-horni Bjarnareyjar í nótt.

Haraldur, sem er á strandveiðum, var komin út að Klettsnefinu í innsiglingunni í Eyjum þegar hann sá þetta gerast, sem var um klukkan þrjú í nótt. Frá Klettsnefinu út að Bjarnarey er um það bil ein og hálf sjómíla.

„Ég sigldi út að Bjarnarey og sá þar sem kominn er tangi þar undir sem fyllan kom fram, enda féllu þarna niður björg sem eru tugir ef ekki hundruð tonna. Þarna var áður þverhnípt í sjó fram. Það var mjög sérstakt að sjá þetta gerast," segir Haraldur sem var á veiðum á Jökulsárhrauni út af Sólheimasandi þegar mbl.is rætt við hann fyrir stundu.

Björg féllu úr Bjarnarey fyrir nokkrum dögum og telur Haraldur að þessar hræringar megi rekja til frostsprungna. Tæplega sé hægt að setja þessar hræringar í samhengi við eldgosið í Eyjafjallajökli.