Ólafur Þór Hauksson (t.h.), sérstakur saksóknari. mbl.is/Eggert

„Við getum í raun ekkert sagt,“ sagði Ólafur Þór Hauksson, sérstakur saksóknari, í samtali við mbl.is, spurður út í handtökutilskipun á hendur Sigurði Einarssyni, fyrrverandi stjórnarformanns Kaupþings.

„Við erum á miðju kafi í umfangsmikilli rannsókn sem er á viðkvæmu stigi,“ segir Ólafur. Ekki sé hægt að gefa upplýsingar um hvort fleiri handtökur séu í farvatninu.

Sigurður var í gær eftirlýstur á heimasíðu Alþjóðalögreglunnar, Interpol að beiðni sérstaks saksóknara. Ólafur Þór vill ekkert tjá sig um málið utan þess að segja að embættið eigi í góðum samskiptum við bresk lögregluyfirvöld. „Við erum í beinum samskiptum við þá menn sem vinna við þessi mál innan Serious Fraud Office. Það getur ekki orðið betra.“

Spurður almennt út í gang rannsóknarinnar segir Ólafur: „Mér sýnist þetta ganga eins og við er að búast. [...] Þetta er svo fljótt að breytast.“ Upplýsingar sem komi fram við skýrslutökur geti leitt rannsakendur á nýjar brautir. Allar áætlanir geti því breyst með skömmum fyrirvara.

Finnur fyrir stuðningi Norðurlandanna

Ólafur Þór væntanlegur heim frá Svíþjóð í dag þar sem hann sat fund með yfirmönnum efnahagsbrotadeilda á Norðurlöndunum. Rætt hafi verið um með hvaða hætti menn geti stutt hver við annan. Ólafur Þór kveðst hafa fundið fyrir mjög jákvæðum viðbrögðum gagnvart þeirri stöðu sem Ísland sé í. Norðurlöndin séu öll reiðbúin að aðstoða Ísland við rannsóknin á efnahagsbrotamálum. „Við finnum fyrir miklum stuðningi,“ segir Ólafur Þór. 

Aðspurður segir hann stuðninginn ekki aðeins vera í orði. „Ríkissaksóknarinn í Noregi kom til Íslands fyrir síðustu áramót, Tor-Aksel [Busch], í kjölfarið kom boð um það að þeir væru boðnir og búnir til að aðstoða okkur. Það er búið að setja plön um að það komi starfsmenn øko-krimi [norsku efnahagsbrotadeildarinnar] yfir til okkar í næsta mánuði,“ segir Ólafur Þór.

Um 30 manns vinna nú við rannsókn málsins, en stefnt er að því að fjölga starfsmönnum töluvert.