Steingrímur J. Sigfússon, fjármálaráðherra, á Alþingi. mbl.is/Árni Sæberg

Eygló Harðardóttir, þingmaður Framsóknarflokks, beindi því til fjármálaráðherra hvernig stefna ríkisstjórnarinnar um vistvæn innkaup, sem samþykkt var í mars 2009, hafi verið innleidd hjá fjármálaráðuneytinu.

Steingrímur J. Sigfússon, fjármálaráðherra, rifjaði upp að frá árinu 2002 hafi fjármálaráðuneytið haft að leiðarljósi í öllum innkaupum ríkisins að taka tillit til vistvænna áhrifa. Benti hann á að vistvæn innkaup snúist ekki aðeins um virðingu fyrir umhverfinu heldur gæti falist í þeim sparnaður og aukin gæði. Sagði hann íslenska ríkið kaupa vörur og verk fyrir tugi milljóna á ári hverju.

Sagði hann mikilvægt að greina raunverulega þörf. Þannig snúist vistvæn innkaup ekki bara um að kaupa umhverfisvænar vörur heldur gæti þau einnig falist í því að endurskoða hlutina, nýta vörur betur en áður og sleppa því jafnvel að kaupa hluti og breyta þess í stað starfsháttum. Nefndi hann aukna endurvinnslu í þessu samhengi og hvetja starfsfólk til þess að prenta báðum megin á síður. Nefndi hann einnig aukin rafræn skil á gögnum til að spara pappír.

Siv Friðleifsdóttir, þingmaður Framsóknarflokks, sagði ánægjulegt að heyra um markmið fjárlagaráðherra og hvatti hann jafnframt til dáða. Rifjaði hún upp að áður fyrr hafi öll þingskjöl verið prentuð út fyrir alla þingmenn og þeim dreift á borðum, en þetta væri sem betur fer liðin tíð. Tók hún hins vegar fram að vafalaust mætti gera enn betur á Alþingi.

Einar Kr. Guðfinnsson, þingmaður Sjálfstæðisflokks, sagðist hafa efasemdir um að einblína ætti á að spara pappír. Frekar ætti að setja kraft í að efla skógrækt.

Steingrímur sagði vissulega rétt að það væri ekki óumhverfisvænt að planta trjám svo framarlega sem ræktunin væri sjálfbær.