Hér sést trukkurinn á slysstað. Eins og sést var fallið niður af veginum ansi bratt og hátt. Ökumaðurinn slapp vel.

Fiskflutningabíll valt á sunnanverðri Klifaheiði, skammt frá Patreksfirði, um klukkan ellefu fyrir hádegið í dag. Hann var að flytja tólf tonn af fiski í körum og valt heilan hring, um það bil tuttugu metra út fyrir veginn, niður mjög bratta hlíð.

Ökumaðurinn slapp ótrúlega vel eftir atvikum. Hann komst ekki af sjálfsdáðum út úr bílnum, en lögregla, sjúkrabílar og slökkvilið komu á staðinn.

Að sögn Davíðs Rúnars Gunnarssonar, slökkviliðsstjóra í Vesturbyggð og Tálknafirði, komust menn fljótt að bílnum og þurfti ekki mikla klippivinnu til að ná manninum út úr bílnum. Hann var að því loknu fluttur til aðhlynningar á heilsugæslustöðinni á Patreksfirði, en var ekki talinn alvarlega slasaður.

Björgunarsveitir af svæðinu hafa verið kallaðar út til verðmætabjörgunar, en þær eru rétt nýbúnar að hefja vinnu á staðnum núna. Að sögn Davíðs Rúnars er talið líklegt að stór hluti farmsins sé ónýtur, en þó verði hægt að bjarga einhverju af honum. Hann segir að bíllinn sé mjög illa farinn.

Hér sést trukkurinn á slysstað. Eins og sést eru bæði trukkurinn og farmurinn illa farin. Ökumaðurinn slapp vel.

Slökkviliðsmenn við björgunarstörf á vettvangi.