Jón Ásgeir Jóhannesson. mbl.is/Ómar

Jón Ásgeir Jóhannesson er farinn úr stjórn Iceland keðjunnar og stjórn House of Fraser í kjölfar þess að mál var höfðað gegn honum af slitastjórn Glitnis í New York, samkvæmt frétt á vef Retail Week.

Glitnir fór fram á að eignir Jóns Ásgeirs Jóhannessonar, Pálma Haraldssonar og Lárusar Welding verði kyrrsettar á Íslandi í síðustu viku. Hljóðar krafan upp á sex milljarða króna. Kyrrsetningarbeiðnin hefur ekki verið tekin fyrir hjá sýslumanninum í Reykjavík og er ekki gert ráð fyrir að það verði gert í dag.

Eignir Jóns Ásgeirs eru kyrrsettar víðsvegar um heiminn en breskur dómari staðfesti kyrrsetninguna í síðustu viku og þarf  Jón Ásgeir að upplýsa um eignir sínar fyrir klukkan 13 í dag. Að öðrum kosti á hann yfir höfði sér fangelsisvist. Ekki hefur fengist upplýst hvort listinn hefur verið lagður fram.

Segir í tilkynningu sem almannatengslafyrirtækið Kraeb Gavin Anderson hefur sent frá sér að eftirsjá fylgi ákvörðun Jóns Ásgeirs um að fara úr stjórnum félaganna en hann hafi ákveðið þetta til þess að koma í veg fyrir að málshöfðunin gegn honum hafi óréttmæt skaðleg áhrif á smásölufyrirtækin. Í tilkynningunni sem Retail Week vísar í kemur fram að Jón Ásgeir muni verja sig gegn þeim ásökunum sem Glitnir beri á hann og ítrekað að Jón Ásgeir sé saklaus af þeim ásökunum sem þar komi fram. Jafnframt er tekið fram að ekki verði veittar frekari upplýsingar á meðan málaferlin standa yfir.

Glitnir banki hóf í síðustu viku málaferli fyrir dómstól á Manhattan í New York-ríki í Bandaríkjunum gegn Jóni Ásgeiri Jóhannessyni, áður helsta hluthafa bankans, Lárusi Welding, áður forstjóra Glitnis, Þorsteini Jónssyni, áður stjórnarformanni, ásamt fleiri fyrrverandi stjórnarmönnum, hluthöfum og öðrum sem áttu hlut að máli með Jóni Ásgeiri, fyrir að hafa með sviksamlegum og ólöglegum hætti haft fé af bankanum sem nemur meira en tveimur milljörðum dala.