Helgi Magnússon. mbl.is

Stjórn Lífeyrissjóðs verzlunarmanna ætlar að láta reyna á það fyrir dómstólum hvort íslenskir bankar hafi blekkt sjóðinn með markaðsmisnotkun sem kostaði hann umtalsvert tap m.a. í gjaldmiðlunarsamningum. Þetta kemur fram í tilkynningu.

Lífeyrissjóður verzlunarmanna mun gera kröfur um bætur, að því er fram kom í máli Helga Magnússonar, stjórnarformanns sjóðsins, á ársfundi hans í kvöld. 
 
„Ein af meginniðurstöðum skýrslu Rannsóknarnefndar Alþingis er að flest bendi til þess að íslenskir bankar og mikilvægir aðstandendur þeirra hafi stundað markaðsmisnotkun í viðskiptum með hlutabréf og í gjaldeyrisviðskiptum sem leiddi m.a. til þess að krónan féll með gríðarlegum afleiðingum fyrir þá sem skulduðu í erlendri mynt. Lífeyrissjóður verzlunarmanna var með gjaldmiðlunarsamninga í gildi hjá tveimur af stóru bönkunum. Við fall krónunnar varð umtalsvert tap á þeim samningum. Tapið var fært til gjalda hjá sjóðnum í ársreikningi 2008,“ sagði Helgi í ræðu sinni.
 
„Í ljósi þess sem kemur fram í skýrslu Rannsóknarnefndar telur stjórn sjóðsins einsýnt að látið verði reyna á það fyrir dómstólum hvort sjóðurinn hafi verið beittur blekkingum. Kröfur verða gerðar um bætur sjóðnum til handa. Ekkert annað kemur til greina en að fá niðurstöðu dómstóla í þessum alvarlegu málum. Okkur er kunnugt um að aðrir lífeyrissjóðir, sem eru í svipaðri stöðu, hafa uppi sambærileg áform um lögsóknir,“ sagði Helgi ennfremur.

Í fremstu röð

Íslenska lífeyrissjóðskerfið er í fremstu röð í heiminum í dag en meira en 1.800 milljarðar króna eru í íslensku lífeyrissjóðunum. Þetta kom jafnframt fram í máli Helga.

Einungis Hollendingar og Svisslendingar standi jafnfætis Íslendingum hvað varði styrk lífeyrissjóðskerfisins. Þessi þrjú ríki eigi sparnað í lífeyrissjóðum sem nemi 120-130% af landframleiðslu en önnur ríki standi þar langt að baki. 

„Þetta er mikilvægt fyrir langtímasparnað Íslendinga og lífeyrissjóðirnir munu gegna lykilhlutverki í endurreisn Íslands ef vel tekst til og sjóðirnir fá góðan stuðning og vinnufrið,“ sagði Helgi.
 
Af 1.800 milljarða eignum íslensku lífeyrissjóðanna eru 530 milljarðar króna í erlendum eignum eða um 30%. Helgi sagði að þessi fjárhæð þyrfti að vera hærri til að tryggja betri áhættudreifingu á eignum sjóðanna. „Íslenska hagkerfið hefur ekki reynst betur en svo að landsmenn væru mun betur settir ef hærra hlutfall eigna sjóðanna væri geymt og ávaxtað í öðrum hagkerfum en hinu íslenska. Því eru núverandi gjaldeyrishöft sjóðunum skaðleg og við hljótum að gera þá kröfu til stjórnvalda að þau hraði afnámi gjaldeyrishafta sem mest má verða,“ sagði Helgi.