Mistur er yfir höfuðborgarsvæðinu þessa stundina. mbl.is/Kristinn

Suðaustlæg átt er ríkjandi á Suðurlandi og því berst aska frá Eyjafjallajökli yfir höfuðborgarsvæðið. Hluti af öskunni er svifryk. Svifryksgildi hafa hækkað hratt í dag og líklegt að þau verði há næstu tvær klukkustundir en búist er við úrkomu í kvöld og að þá dragi hratt úr menguninni.

Klukkan 15:30 var hálftímagildi svifryks í mælistöðinni á Grensásvegi 318 míkrógrömm á rúmmetra en heilsuverndarmörk svifryks eru 50 míkrógrömm á rúmmetra á sólarhring. Einnig eru gildin há í mælistöðinni í Hafnarfirði, segir í tilkynningu frá Heilbrigðiseftirliti Reykjavíkur. 

„Það er mjög þurrt loft. Þannig að þetta lítur ekki út fyrir að vera mistur. Og svo hafa rykmælingar hjá Umhverfisstofnun rokið upp,“ segir Theodór Theodór Freyr Hervarsson veðurfræðingur í samtali við mbl.is.

Ekki er mikill vindur á Suðurlandi þessa stundina. „Þetta hefur einhversstaðar náð sér upp. Af því það er austanátt hér allra syðst, þá getur verið að það sem slær niður af fjöllum, þar þyrli hann aðeins upp,“ segir hann.

Menn urðu fyrst varir við öskuna fyrir um einni og hálfri klukkustund. „Við sáum að það var dálítið mikið mistur á Suðurlandi, á vefmyndavélum þar, mikið fyrr,“ segir Theodór. Vegna skýjahulu sjáist ekki nægileg vel á gervitunglamyndum hvar uppsprettan sé. Því sé liggur ekki fyrir um hversu stórt svæði sé að ræða.

Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef ástæða þykir til. Þar sem nú er að hefjast annatími í umferðinni í borginni er ástæða til að benda þeim á sem eru með viðkvæm öndunarfæri s.s. lungnasjúkdóma eða astma að vera innandyra. Ekki er þó víst að að styrkur svifryks fari yfir sólarhrings-heilsuverndarmörk í dag en þau er 50 míkrógrömm á rúmmetra.

Viðbragðsáætlun vegna loftgæða var yfirfarin í apríl til að tryggja viðeigandi vöktun og undirbúning í ljósi eldgossins í Eyjafjallajökli. Fylgst er með ástandinu í samráði við Heilbrigðiseftirlit, Almannavarnir, Slökkvilið höfuðborgarsvæðisins og Sóttvarnarlækni.  

Íbúar eru geta einnig fylgst með fréttum og kynnt sér upplýsingar og leiðbeiningar á heimasíðu Almannavarna, www.almannavarnir.is og heimasíðu landlæknisembættisins, www.landlaeknir.is  og með vefmæli Reykjavíkurborgar, neðst á heimasíðu www.reykjavik.is, sem sýnir styrk svifryks  hverju sinni.