Ari Kristinn Jónsson, rektor Háskólans í Reykjavík. Ómar Óskarsson

Ari Kristinn Jónsson, rektor Háskólans í Reykjavík, kveðst ekki geta fallist á tillögu Félags prófessora við ríkisháskóla um að Háskóli Íslands taki við nemendum Háskólans í Reykjavík. Ari leggur áherslu á að auka þurfi samstarf háskólanna og telur best að halda samkeppni þeirra en ef nauðsynlegt væri að fara þessa leið væri nær að Háskólinn í Reykjavík tæki við nemendum HÍ í tækni- og viðskiptagreinum og lögum.

Ari Kristinn segir það skiljanlegt og mannlegt að Félag prófessora við ríkisháskóla leggi fram slíkar tillögur til að vernda sín eigin störf. „En við þurfum að horfa á þetta út frá miklu breiðari hagsmunum Íslands í heild og þá sérstaklega atvinnulífsins, og út frá þeirri miklu uppbyggingu sem framundan er. Ég tel að það sé miklu nær fyrir háskólafólk á Íslandi að snúa bökum saman frekar en að beina spjótunum hvert að öðru því við stöndum aftarlega í fjármögnun háskóla miðað við nágrannalöndin og háskólamenntun skiptir gríðarlega miklu máli fyrir uppbygginguna sem er framundan.“

Ari bætir við að tillagan standist ekki faglega, meðal annars vegna þess að Háskólinn í Reykjavík útskrifi tvo þriðju af tæknimenntuðu háskólafólki á Íslandi, þ.e. í verkfræði, tölvunarfræði og skyldum greinum, og um helminginn af þeim sem útskrifast í viðskiptagreinum. Þetta sé því gríðarmikill þáttur í starfsemi háskólans og engin „aukabúgrein“.

Ari segir Félag prófessora við ríkisháskóla ekki taka tillit til þess að í rannsóknum standi Háskólinn í Reykjavík jafnfætis Háskóla Íslands í þessum greinum, þ.e. tækni, viðskiptum og lögum, og töluvert framar í sumum þeirra. „Þannig að það væri annað sem myndi tapast og þetta eru rannsóknir sem skipta miklu máli fyrir Ísland og atvinnulífið.“

Ari bætir við að kostnaður ríkisins á hvern útskrifaðan nemanda og vegna þessara rannsókna í Háskólanum í Reykjavík sé hlutfallslega lægri en hjá Háskóla Íslands. „Þannig að ef við viljum fara þessa leið þá væri nærtækara, faglega og fjárhagslega, að færa háskólakennslu í tækni, viðskiptum og lögum til Háskólans í Reykjavík.“

Ari tekur þó fram að samkeppnin milli háskóla sé af hinu góða og hafi gefist mjög vel. Besti kosturinn sé því að halda henni ef mögulegt er.