Margir borgarbúar nutu veðurblíðunnar um hvítasunnuna. mbl.is/Ómar

Veðrið var einstaklega blítt um hvítasunnuhelgina á Suður- og Vesturlandi að sögn Einars Sveinbjörnssonar veðurfræðings. Það sköpuðust ákjósanleg skilyrði fyrir háan hita víða, enda hægviðrasamt, háþrýstingur og hlýtt í lofti.

„Hvítasunnudagur var hlýjastur. Þá fór hann í 20,3 gráður í Árnesi í Gnúpverjahreppi. Það var hæsti hiti sem mældist þessa helgi. Það var hlýjast í Reykjavík í gær, en þá fór hann í 16 gráður,“ segir Einar í samtali við mbl.is.

Hann bendir á að þegar það geri ágætis veður um landið sunnan- og vestanvert þá andi köldu af norðri. „Í útsveitum fyrir norðan þá var hitinn ekki nema um fjórar til fimm gráður um miðjan daginn í gær. Og næturfrost ekkert óalgengt á þessum slóðum.“

Einar tekur hins vegar fram að það sé algengt að hitinn fari í um 20 stig á skjólsælum stöðum á Suður- og Vesturlandi, t.a.m. á Þingvöllum, í Biskupstungunum og uppsveitum Borgarfjarðar.

Hann segir að samkvæmt upplýsingum sem Trausti Jónsson veðurfræðingur sé búinn að taka saman um það hvenær hitinn fari fyrst í 20 stig á vorin að jafnaði, þá gerist það sífellt fyrr. „Síðustu ár þá hefur þetta að jafnaði verið í kringum 20. til 25. maí,“ segir Einar og bendir á að þetta sé því á réttu róli. 

Einar segir áfram sé spáð hægviðri næstu daga, en áfram norðanátt. Ekki verði jafn hlýtt loft yfir landinu og því sé ólíklegt að hitinn verði jafn hár á Suðurlandi og hann hafi verið nú um helgina.

 Að sögn Einars er útlit fyrir að það fari að rigna í næstu viku.