Stjórnsýsluhúsið á Ísafirði. mynd/bb.is

Héraðsdómur Vestfjarða hefur fellt úr gildi áminningu, sem sýslumaðurinn á Vestfjörðum veitti löglærðum fulltrúa hjá embættinu í júlí á síðasta ári.

Taldi dómurinn, að sýslumaðurinn hefði brotið gegn meðalhófsreglu stjórnsýslulaga með því að áminna fulltrúann án þess að grípa áður til annarra og vægari úrræða og veita fulltrúanum tækifæri til að taka sig á í starfi og laga vinnubrögð sín að kröfum sýslumanns.

Fram kemur í dómnum að fulltrúinn, sem er kona, veiktist fyrri hluta ársins 2009 og þurfti af þeim sökum að leggjast inn á sjúkrahús og gangast undir uppskurð. Var fulltrúinn frá vinnu vegna þessa í rúman mánuð og kom síðan til starfa í byrjun júlí eftir sumarleyfi. Þá afhenti sýslumaðurinn konunni bréf þar sem kom fram að hann áformaði að veita henni áminningu fyrir óhlýðni við fyrirmælum yfirmanns, óvandvirkni í starfi og fyrir að sýna ekki fullnægjandi árangur í starfi. Formleg áminning var síðan veitt hálfum mánuði síðar.

Fulltrúinn höfðaði mál og krafðist þess að áminningin yrði felld úr gildi. Í niðurstöðu dómsins segir m.a. að læknisvottorð þyki skjóta styrkum stoðum undir þann málatilbúnað fulltrúans að starfsþrek hans hafi að nokkru leyti verið skert í mars og apríl 2009 og beri til þess að líta við úrlausn málsins eftir því sem við á.

Þá segir dómurinn, að taka megi undir að fulltrúinn hafi ekki sinnt nægilega starfsskyldum sínum og gert mistök við meðferð mála, sem sýslumaðurinn tilgreindi. Fram hjá því verði hins vegar ekki litið að áminning sé íþyngjandi stjórnvaldsákvörðun sem geti til starfsmissis. Verði ekki séð, að sýslumaður hafi áður aðhafst nokkuð það sem með réttu verður talin tilraun til að fá fulltrúann til að taka sig á í starfi og laga vinnubrögð sín að kröfum sýslumanns. Féllst dómurinn á kröfuna um að fella áminninguna úr gildi.