mbl.is/Sverrir

Starfsmaður Neytendastofu fór í eftirlitsferð í 22 apótek á höfuðborgarsvæðinu í apríl og maí til að fylgja eftir fyrri eftirlitsferð sem farin var í mars, en þá fengu þessi apótek áminningu vegna ófullnægjandi verðmerkinga. Meirihluti apótekanna hafði tekið vel í ábendingar um að bæta verðmerkingar. Af 22 apótekum voru 15 með verðmerkingar í lagi en sjö höfðu ekki brugðist nógu hratt við og var verðmerkingum þar ábótavant.

Skoðað var hvort verðmerkingar í verslun og við afgreiðsluborð væru í lagi, ásamt því að borið var saman verð á hillu og afgreiðslukassa á 5 vörum völdum af handahófi.

Voru það Árbæjarapótek Hraunbæ 115, Laugarnesapótek Kirkjuteigi 21, Lyf og heilsa í Glæsibæ og Fjarðarkaupum, Lyfjaval í Mjódd og Álftamýri 1 og Reykjavíkurapótek Seljavegi 2 sem ekki höfðu gert úrbætur á merkingum hjá sér.

Það sem vakti helst athygli var að af þessum sjö voru sex apótek enn með verðmerkingar í og á bak við afgreiðsluborð í ólestri og þar af voru þrjú apótek, bæði Lyfjaval í Mjódd og Álftamýri og Reykjavíkurapótek, enn með lausasölulyf óverðmerkt, að því er segir í frétt á vef Neytendastofu.

Samræmi á verði í hillu og á afgreiðslukassa var gott, í fjórum tilvikum var verð hærra á kassa en í hillu og tvisvar var verð lægra á kassa en í hillu.