mbl.is

„Þetta eru auðvitað gríðarleg vonbrigði að það þurfi að fresta mótinu nú þegar allt er tilbúið. En það er ekkert annað hægt að gera í núverandi stöðu þar sem velferð íslenska hestsins verður að vera í fyrirrúmi,“ segir Jóna Fanney Friðriksdóttir, framkvæmdastjóri Landsmót hestamanna. 

Ákveðið var á fundi hagsmunaaðila í hrossarækt fyrr í dag að fresta landsmóti hestamanna í sumar vegna hrossapestarinnar sem herjað hefur á íslenska stofninn. Halda átti landsmótið á Vindheimamelum dagana 27. júní til 4. júní.

Að sögn Jónu Fanneyjar var ákveðið að fresta mótinu til 2011 í góðu samstarfi við Alþjóðasamtök Íslandshestafélaga (FEIF). „Það kemur til af því að heimsmeistaramót er haldið það ár sem landsmótið er ekki. Þannig að á næsta ári verður bæði heimsmeistaramót og landsmót.“

Jóna Fanney segir ljóst að tjónið sem hljótist af því að fresta mótinu hlaupi á milljörðum. „Þá er ég að vísa til bæði beinna og óbeinna áhrifa,“ segir Jóna Fanney og bendir á að auk landsmótsins verði hrossaræktendur og ferðaþjónustan fyrir miklu tjóni. „Ekki bara í Skagafirði heldur á landinu öllu, því erlendir gestir landsmótsins fara oft á tíðum um landið.“

Að sögn Jónu Fanneyjar var búist við við um 10-12 þúsund gestum á landsmótið. Þegar var búið að selja á fjórða þúsund miða og verður fólki boðið að geyma miðann sinn um ár. Jóna Fanney áætlar að um 25% gesta á landsmótinu komi erlendis frá. 

„Mér finnst það sýna það og sanna þegar svona voveiflegur atburður gerist, sem ekki er af mannanna völdum, hvað landsmótið er gríðarlega mikilvægt og mikill og sterkur markaðsgluggi. Og það er einmitt ástæðan fyrir því að við frestum þessu til 2011 í stað þess að bíða til 2012. Því greinin þarf að koma sér að auk þess sem við verðum að gefa barnaflokkum tækifæri til þess að komast á landsmót, annars er hætta á því að við missum heila kynslóð út.“ 

Kalla eftir rannsókn á upptökum hestapestarinnar

Vegna smitandi hósta í hrossum var haldinn fundur hagsmunaaðila í hestamennsku og hrossarækt ásamt yfirvöldum dýralæknamála, starfandi dýralæknum og fulltrúum leiðbeiningaþjónustu og sjávarútvegs- og landbúnaðarráðuneytisins. Fundurinn var haldinn í Íþróttamiðstöðinni í Laugardal 31. maí 2010 og þar var eftirfarandi ályktun samþykkt:

„Fundurinn samþykkir að fresta Landsmóti hestamanna sem fram átti að fara á Vindheimamelum í Skagafirði 27. júní til 4. júlí í sumar.
Fundurinn beinir því jafnframt til stjórna Landssambands hestamannafélaga (LH) og Bændasamtaka Íslands (BÍ) að þær vinni að því í góðu samstarfi við Alþjóðasamtök Íslandshestafélaga (FEIF) að mótið verði haldið árið 2011 á Vindheimamelum í Skagafirði.
Jafnframt skorar fundurinn á áður nefnd samtök að endurskoða sýninga- og keppnishald næstu mánaða þannig að öll hross sem stefnt var með í dóma,  sýningar og keppni á árinu eigi þann möguleika.

Fundurinn skorar á Matvælastofnun og Tilraunastöð Háskóla Íslands í meinafræði að Keldum að rannsakaður verði til hlítar sá smitandi hósti sem nú herjar á íslenska hrossastofninn. Leita þarf allra leiða til að greina eðli og uppruna sjúkdómsins svo og hvort eitthvað það í hrossahaldi landsmanna sé þess valdandi að erfiðara sé að fást við þá stöðu sem upp er komin en ella. Sett verði fram skipuleg sóttvarnaráætlun til að fyrirbyggja að smitsjúkdómar nái hér bólfestu í framtíðinni.
Fyrir liggur að rannsóknir þær og aðgerðir sem grípa þarf til eru mjög kostnaðarsamar. Fundurinn skorar því á stjórnvöld að tryggja Matvælastofnun og Tilraunastöðinni að Keldum nægjanlegt fjármagn til allra þeirra aðgerða sem grípa þarf til.

Ljóst er að fjárhagslegt tjón hrossaræktenda, hestaíþróttarinnar og annarrar hestatengdrar starfsemi auk ferðaþjónustu er þegar orðið gífurlegt. Þá hefur Landsmót hestamanna ehf. einnig orðið fyrir miklum skakkaföllum því er afar brýnt að stjórnvöld tryggi fjárhagslegan grunn landsmótshalds til framtíðar.“