Katrín Júlíusdóttir afhjúpaði merkið á rafbíl ráðuneytisins. Hólmfríður Sveinsdóttir, formaður nefndar um orkuskipti í samgöngum, stendur með ráðherra.

Katrín Júlíusdóttir iðnaðarráðherra afhjúpaði nýtt merki áætlunar um orkuskipti í samgöngum á ráðstefnu um vistvænar samgöngur. Áætlunin kallast „Græna orkan, Vistorka í samgöngum“.

Markmið hennar að byggja upp klasasamstarf þar sem ráðuneyti, stofnanir, sveitarfélög og fyrirtæki geta unnið saman að því sameiginlega markmiði að auka nýtingu á innlendu vistvænni orku, að því er segir í tilkynningu.

„Tilefni ráðstefnunnar er upphaf vinnu sem iðnaðarráðherra hefur hrundið af stað og skipun  nefndar um orkuskipti í samgöngum. Stefnt er að því að auka samvinnu fyrirtækja, sveitarfélaga og opinberra aðila á þessu sviði og að skapa nauðsynlegar forsendur til að gera orkuskipti í samgöngum að vænlegum kosti. Markmiðið er að efla atvinnuþróun og nýsköpun, hvetja til aukinna rannsókna og þekkingaruppbyggingar og að draga úr notkun jarðefnaeldsneytis í samgöngum. 

Á ráðstefnunni í Háskólanum í Reykjavík kynntu aðilar sem tengjast visthæfum samgöngum verkefni sín og framtíðarsýn. Þar var meðal annars fjallað um breytingar á bílum með hefðbundnar vélar í rafbíla og um bifreiðar framtíðarinnar. Gerð grein fyrir stöðu þeirra verkefna sem unnið hefur verið að hér á landi á þessu sviði undanfarin ár eins og vetnisverkefni og metanverkefni og fjallað um lífdíeselframleiðslu á Íslandi, svo fátt eitt sé nefnt,“ segir í tilkynningu.