Katrín Júlíusdóttir (fyrir miðju) ásamt Jóhönnu Sigurðardóttur. mbl.is/Ómar

Katrín Júlíusdóttir iðnaðarráðherra átti í dag viðræður við Hubert Gambs ráðuneytisstjóra byggðamála hjá framkvæmdastjórn Evrópusambandsins í Brussel. Rætt var um aðildarumsókn Íslands og möguleika í nýsköpunar- og atvinnuþróunarmálum á Íslandi.

Þetta kemur fram í tilkynningu frá iðnaðarráðuneytinu. 

Þar segir að ráðherra hafi einnig átt fund með Per Sanderud framkvæmdastjóra ESA, Eftirlitsstofnunar EFTA, og Per Andreas Bjørgan skrifstofustjóra í samkeppnis- og ríkisaðstoðardeild ESA, m.a um fjárfestingarsamninga og ný rammalög um ívilnanir vegna fjárfestinga á Íslandi sem nú eru til umfjöllunar á Alþingi.

Þá tók iðnaðarráðherra í morgun þátt í kynningu á vegum Útflutningsráðs og Ferðamálastofu í Brussel á stöðu ferðamála á Íslandi fyrir 30 blaðamenn og fulltrúa ferðaheildsala í Belgíu.

Ráðherra ræddi einnig við fjölmiðla að lokinni kynningu. Á fundinum flutti Rikke Pedersen forstöðumaður Norræna eldfjallasetursins ítarlegt erindi um gos í Eyjafjallajökli og eldfjallarannsóknir á Íslandi.

Þá gerði Davíð Jóhannsson Evrópufulltrúi Ferðamálastofu grein fyrir átakinu Inspired by Iceland. Allir viðstaddir fengu ösku úr Eyjafjallajökli í gjafapakkningum. Ferðamönnum frá Belgíu til Íslands hefur farið fjölgandi síðustu ár og benda bókanir í beint flug Icelandair frá Brussel til Keflavíkur, sem hófst síðastliðinn laugardag, til þess að áframhald verði á þeirri þróun.