Katrín Jakobsdóttir menntamálaráðherra er hvött til að taka við undirskriftarlista námsmanna. mbl.is/Eggert

Námsmenn ætla að efna til mótmæla fyrir utan menntamálaráðuneytið í hádeginu á morgun, en þeir vilja mótmæla breyttum úthlutunarreglum Lánasjóðs íslenskra námsmanna.

„Tilgangur mótmælanna er að sýna einhug og samstöðu námsmanna gegn þessum breytingum í verki og þrýsta á Katrínu Jakobsdóttur, menntamálaráðherra, til að taka tillögurnar til endurskoðunar,“ segir Jens Fjalar Skaptason, formaður Stúdentaráðs HÍ, í tilkynningu.

Fram kemur að Stúdentaráðið í samvinnu við Samband íslenskra framhaldsskólanema og námsmannahreyfingar Háskólans í Reykjavík, Háskólans við Bifröst, Landbúnaðarháskólanum og Háskólanum á Akureyri standi fyrir mótmælunum.

Jens bendir á að fulltrúar námsmanna í stjórn LÍN, hafi neitað að samþykkja breytingartillögur á úthlutunarreglum sjóðsins, ólíkt meirihluta stjórnarinnar.

„Nú liggja tillögurnar á borði til samþykktar, en ljóst er að þær munu hafa í för með sér umtalsverða kjaraskerðingu fyrir stúdenta,“ segir Jens í tilkynningu. 

Þá segir að Stúdentaráð HÍ hafi efnt til undirskriftarsöfnunar og að hægt verði hægt að bæta nöfnum við listann fram til þriðjudagsmorguns.

Menntamálaráðherra hefur verið boðaður á mótmælin til að taka formlega við listanum.