Guðlaug Kristjánsdóttir mbl.is

Guðlaug Kristjánsdóttir, formaður BHM, segir að ákall Árna Páls Árnasonar, félags- og tryggingamálaráðherra eftir þjóðarsátt um að laun hjá hinu opinbera verði fryst til ársloka 2013, komi sér ekki á óvart. 

„Þetta eru ekki nýjar fréttir og við erum svo sem búin að heyra þessa hugmynd áður. Við hjá BHM erum búin að vera samningslaus í á annað ár og launin okkar hafa ekkert hreyfst nema niður. Þannig að að vissu leyti mætti segja að frysting væri hlé á þeim beinu kjaraskerðingum við höfum orðið fyrir,“ segir Guðlaug. Bendir hún á að nýleg kjarakönnun félagsins hafi leitt í ljós að 70% félagsmanna BHM hafi frá upphafi árs 2009 staðið í stað launalega eða lækkað hvort heldur sem er á opinbera eða almenna vinnumarkaðnum.

Spurð hvort hún telji útspil ráðherra nú tengjast þeirri ákvörðun forsvarsmanna BHM að segja sig frá stöðugleikasáttmálanum svarar Guðlaug því neitandi og telur hugmynd ráðherra var partur af því umhverfi sem blasi við í niðurskurðinum. 

„Upphaflega var nú lagt af stað með að vernda störfin eins og hægt væri. Það loforð er svolítið farið að dala. Það var vitað frá upphafi Alþjóðagjaldeyrissjóðsáætlunarinnar að þar væri verið að tala um 20% minna umfang hins opinbera og launakostnaður er þar einn stærsti útgjaldaliðurinn,“  segir Guðlaug.

Spurð hvort hún telji að frysting launa hjá hinu opinbera geti leitt til verkfalla og þess að vinnumarkaðurinn logi í illdeilum segir Guðlaug það allt fara eftir því hver verði næsti skref ríkisstjórnarinnar. 

„Ríkisstjórnin þarf að sýna trúverðugleika í því sem hún er að gera, að það sé einhver heildstæð áætlun í gangi. Ef sú leið er skýr og ef aðferðirnar eru trúverðugar þá eru meiri líkur á því að starfsmenn hins opinbera taki þátt. En ef þetta verður eitthvað tilviljunarkennt og ómarkvisst þá mega þeir passa sig á stemningunni sem myndast getur,“  segir Guðlaug.