Þeir viðburðir sem skipulagðir hafa verið í Viðey það sem af er sumri hafa verið afskaplega vel sóttir og voru um 1000 manns í eynni helgina sem Hátíð Hafsins var haldin í Reykjavík. Að sama skapi var slegið aðsóknarmet í fyrstu þriðjudagsgöngu sumarsins því aldrei fyrr hafa svo margir gestir komið í fuglaskoðunargöngu í Viðey, að sögn Guðlaugar Elísabetar Ólafsdóttur verkefnastjóra Viðeyjar.
Um 150 gestir mættu með myndavélar og kíkja til að skoða og mynda fuglalífið í eynni. Jóhann Óli Hilmarsson fuglafræðingur leiddi gönguna og kvaðst hann aldrei áður á sínum ferli sem fuglaleiðsögumaður hafa farið fyrir svo stórum hópi. Ungir sem aldnir nutu veðurblíðunnar og göngunnar og í ferðinni sást til fjölmargra tegunda eins og sandlóu, gargandar, dílaskarfs, máfs, jaðrakans, rauðbrystings og svo mætti lengi telja.
Ljóst er að sú nýbreytni að hafa Viðeyjarstofu opna á þriðjudagskvöldum fellur vel í kramið hjá gestum Viðeyjar, sem nutu ljúfra veitinga í kvöldsólinni.