„Nú bíða bændur um allt land eftir rigningu,“ segir Ólafur Dýrmundsson, ráðunautur hjá Bændasamtökum Íslands. Heyskapur er að hefjast í sveitum landsins og nokkrir bændur eru þegar farnir af stað.

„Túnin eru orðin falleg og sprettan er góð,“ segir Sigurður Ágústsson, bóndi í Birtingaholti í Hrunamannahreppi. Jafnhliða búskapnum rekur hann Túnfang ehf. sem sinnir heyskap fyrir bændur víða á Suðurlandi. Hann segist munu fara í heyverkun í Landeyjum nú síðari hluta vikunnar og á Skeiðum eftir helgina. Þegar svo komi fram í næstu viku og í kringum þjóðhátíðardaginn ætti sláttur í uppsveitum Árnessýslu að vera kominn á fullt.

„Hér í sveit eru bændur að byrja í heyskap, einn af öðrum, og líklega eru fjórir eða fimm hér í sveit komnir af stað,“ sagði Sigurgeir Hreinsson, bóndi á Hríshól í Eyjafjarðarsveit, í samtali við Morgunblaðið. Hann sagði að rigning sem bændur gera ráð fyrir norðanlands síðari hluta vikunnar væri bændum þar um slóðir afar kærkomin. Með vætuskoti og hlýindum tæki öll spretta við sér og í kjölfarið væri því ekkert til fyrirstöðu að hefja mætti heyskap af krafti.

Í Borgarfirði eru bændur lítið farnir af stað við heyöflun. Kunnugir segja hins vegar að verði úrkoman bændum þar um slóðir hagfelld ætti heyskapur að geta verið kominn á skrið eftir viku til tíu daga.