Ólafur Loftsson, einn af stjórnendum Íslensku alþjóðabjörgunarsveitarinnar, og Kristinn Ólafsson, framkvæmdastjóri SL, afhentu fulltrúum almannavarna á Haítí, Abel Nazaire og Marie Alta Jean-Baptiste, gjöf frá Slysavarnafélaginu Landsbjörg.

Marie Alta Jean-Baptiste, forstjóri almannavarna Haítí, þakkaði íslensku þjóðinni kærlega fyrir allan þann stuðning sem hún hefur sýnt Haítí í tengslum við jarðskjálftann mikla sem varð fyrr á árinu. Þetta kem fram á vinnufundi samtaka alþjóða rústabjörgunarsveita sem starfa innan Sameinuðu Þjóðanna.

Fram kemur í tilkynningu frá Slysavarnafélaginu Landsbjörgu að fulltrúar hennar hafi tekið þátt í fundi INSARAG í Genf í vikunni. Á fundinum hafi verið farið yfir störf rústabjörgunarsveita á Haítí í tengslum við jarðskjálftana í janúar og hvaða lærdóm mætti draga af verkefninu.
 
„Fulltúar rúmlega 50 þjóða mættu á fundinn sem stóð í tvo daga. Auk þessara fulltrúa mætti forstjóri almannavarna Haítí, Marie Alta Jean-Baptiste, á fundinn ásamt föruneyti. Baptiste þakkaði rústabjörgunarsveitunum fyrir frábæra framgöngu eftir jarðskjálftana en um 260 manns var bjargað úr rústunum.
 
 Á fundinum var m.a. rætt hversu skjótt Íslenska alþjóðabjörgunarsveitin brást við útkallinu og vakti það mikla athygli. Fulltrúar Haítí höfðu sérstaklega orð á því hversu mikið það hafið komið þeim á óvart að sjá íslenska rústabjörgunarsveit á flugvellinum í Port au Prince, fyrsta allra.
 
Baptiste notaði tækifærið og sendi kærar kveðjur til íslensku þjóðarinnar fyrir allan þann stuðning sem hún hefur sýnt Haiti í tengslum við þessar miklu hörmunar, annars vegar með að senda íslensku alþjóðabjörgunarsveitina og hins vegar fyrir þann mikla stuðning sem þjóðin hefur sýnt í tengslum við hjálparstörf og uppbyggingu á Haítí,“ segir í tilkynningu Landsbjargar.