Háskólinn í Reykjavík kynnti niðurskurð í dag mbl.is/Kristinn Ingvarsson

Háskólinn í Reykjavík hefur ákveðið að leggja niður þrjár námsbrautir þegar núverandi nemendur hafa lokið sínu námi. Þetta kemur fram í tilkynningu frá skólanum. vær þessara námsbrauta, diplómanám í kennslufræði og MPH (meistaranám) í lýðheilsufræði, verða lagðar niður 2011. Sú þriðja, BSc (grunnnám) í stærðfræði, verður lögð niður 2012.

Segir í tilkynningu frá skólanum að ljóst sé að fjárframlög ríkisins til háskóla á Íslandi muni lækka verulega á næsta ári. Háskólinn í Reykjavík ætlar ekki að mæta því með flötum niðurskurði, heldur með því að efla enn frekar kennslu og rannsóknir í tækni, viðskiptum og lögum, kjarnasviðum skólans, samkvæmt tilkynningu.

Í staðinn verður stærðfræðikennsla í öðru námi á kjarnasviðum skólans styrkt enn frekar. Tæplega 100 af um 3.000 nemendum skólans eru á þessum þremur námsbrautum.

Sálfræði og íþróttafræði áfram kennd

„Breytingarnar verða gerðar í áföngum og mun HR uppfylla allar skuldbindingar sínar gagnvart núverandi nemendum á umræddum námsbrautum. Vert er að geta að áfram verður haldið námi í sálfræði og íþróttafræði við HR.

Það er stór og erfið ákvörðun fyrir háskóla að leggja niður námsbrautir og ekki var farið í slíkt fyrr en aðrar leiðir voru fullreyndar. Námsbrautirnar þrjár, eins og aðrar brautir við Háskólann í Reykjavík, hafa gengið vel og hefur mikil ánægja verið meðal nemenda með kennslu og skipulag námsins.

Lækkun fjárframlaga ríkisins fyrir árin 2009 og 2010 var mætt með auknum byrðum á alla sem starfa við skólann, í formi launalækkunar, aukins álags og mikillar hagræðingar í rekstri.

Þar sem ekki verður lengra komist án þess að það bitni á gæðum starfsins, vill HR mæta enn minnkandi fjárframlögum af ábyrgð og með heildarhagsmuni nemenda og samfélags að leiðarljósi," segir enn fremur í tilkynningunni.

Aðsókn að námi í Háskólanum í Reykjavík er góð og eru umsóknir um skólavist í vor fleiri en í fyrra.

Þær breytingar sem nú eru kynntar eru gerðar með vitund menntamálaráðuneytisins og samræmast þeirri stefnu að skapa skýra sérstöðu og auka verkaskiptingu, segir ennfremur í tilkynningunni sem HR hefur sent til fjölmiðla.