Hægt verður að hefja framkvæmdir við Vestfjarðarlag fljótlega verði frumvarp um Úr safni

Einar Kr. Guðfinnsson alþingismaður lagði í gær fram á Alþingi frumvarp sem miðar af því að hefja megi vegaframkvæmdir í svonefndum Teigsskógi í Austur-Barðarstrandarsýslu. Framkvæmdir þar hafa tafist vegna kröfu um umhverfismat sem Hæstiréttur staðfesti nýlega.

Í samgönguáætlun sem gildir til ársins 2014 er gert ráð fyrir að ljúka uppbyggingu Vestfjarðavegar milli Bjarkalundar í Reykhólahreppi og Flókalundar í Vatnsfirði. Liður í þeirri uppbyggingu er lagning nýs vegar, allt að 48 km, frá Bjarkalundi að Eyri í Kollafirði, sem ætlað er að bæta samgöngur í Reykhólasveit og milli Vestfjarða og annarra landshluta.

Áfangi á þessari leið er vegurinn, sem frumvarpið fjallar um, en hann á að liggja frá Þorskafirði, um Hallsteinsnes, Teigsskóg og Grónes að Melanesi þar sem Djúpifjörður og Gufufjörður yrðu þveraðir.

Vegagerð á þessu svæði hefur eins og áður sagði tafist vegna kröfu um umhverfismat, sem Hæstiréttur staðfesti sl. haust

Fyrir lá úrskurður umhverfisráðherra frá 2007, sem heimilaði framkvæmdir að uppfylltum ströngum skilyrðum, enda bætti vegurinn öryggi vegfarenda til mikilla muna. Taldi rétturinn að ekki mætti taka tillit til aukins umferðaröryggis þegar umhverfisáhrif væru metin, en Einar K. Guðfinnsson, þingmaður Sjálfstæðisflokks, fyrsti flutningsmaður frumvarpsins og meðflutningsmenn hans, Ásbjörn Óttarsson og Gunnar Bragi Sveinsson eru ósammála því mati.

„Það er algjörlega óviðunandi að vegagerð á þessum slóðum geti ekki haldið áfram þegar peningar til verksins eru til staðar. Í raun er þetta til háborinnar skammar. Markmið þess frumvarps sem er hér lagt fram, er að rjúfa þennan grafalvarlega vítahring og heimila vegagerðina með lögum,“ segir Einar Kr. Guðfinnsson í samtali við Morgunblaðið á dögunum.

Frumvarpið gerir ráð fyrir að þegar verði hafist handa við að leggja veginn án umhverfismats, enda liggi úrskurður umhverfisráðherra fyrir. Á samgönguáætlun 2007 – 2010 voru áætlaðir um þrír milljarðar til framkvæmda. Verði frumvarpið að lögum ætti því ekkert að vera því til fyrirstöðu að vegurinn verði lagður, hvorki umhverfismat né fjárskortur.