mbl.is/Sverrir

Frumtök benda á að það sé mat rannsóknarstofnunar um lyfjamál við Háskóla Íslands að árangur af breytingum á greiðsluþátttöku ríkisins í lyfjakostnaði sé óviss og breytingarnar ómarkvissar.

Fram kemur á vef Frumtaka, sem eru samtök framleiðenda frumlyfja, að í  niðurstöðu skýrslu stofnunarinnar, þar sem könnuð hafi verið möguleg áhrif greiðsluþátttökubreytinganna, segi að í öðrum löndum sem innleitt hafi jafn viðamiklar breytingar og hér sé um að ræða, hafi að jafnaði verið fyrirliggjandi í gagnagrunnum gögn til að nota við árangursmat. Skýrslan var unnin að beiðni Frumtaka. 

Gagnasöfn sem nýta megi til árangurs- og afleiðingamats aðgerða í heilbrigðisþjónustu séu nauðsynleg til að áhrif aðgerðanna megi meta á skilvirkan hátt.

„Ef ráðist sé í aðgerðir af þessum toga, án nokkurrar áætlunar um árangursmat sé hætta á að aðgerðirnar verði ómarkvissar, árangurinn ógagnsær og óvissa verði um áhrif á þjóðarhag, sem og heilsu sjúklinga, bæði til lengri og skemmri tíma,“ segir á vef Frumtaka.