Sundlaugin á Álftanesi. Heiðar Kristjánsson

Var tillögunni vísað til bæjarráðs sem mun væntanlega fjalla um hana á fundi sínum á fimmtudagsmorgun. Að sögn Snorra Finnlaugssonar, forseta bæjarstjórnar, mun Álftanes væntanlega vera í samfloti með öðrum sveitarfélögum varðandi þessi mál.

Leiðréttingar slíkra lána gætu haft mikil áhrif þann fjárhagsvanda sem bæjarfélagið glímir við í dag. Kristín Fjóla Bergþórsdóttir varabæjarfulltrúi Á-lista segir að allar forsendur sem unnið sé út frá í dag varðandi skuldastöðu bæjarfélagsins séu því breyttar.

Á fundi bæjarstjórnar var jafnframt lagt til að fulltrúa Álftaness í stjórn Fasteignar verði falið að krefjast rannsóknar á því hvort Fasteign, sem er fasteignafélag 12 sveitarfélaga og Háskólans í Reykjavík, geti ekki með sama hætti krafist skaðabóta vegna gengistryggðra lána og á grundvelli slíkrar hugsanlegrar leiðréttingar verði leigusamningar Fasteignar lækkaðir.

 Í bókun fulltrúa Á-lista í bæjarstjórn Álftaness segir að leiðrétting á lánum sveitarfélagsins gæti numið nokkur hundruð milljónum. Jafnframt hafi gengishrunið hækkað leigusamninga um tugmilljónir árlega. Mismunur á áætlaðri árlegri leigu sundmiðstöðvar, þegar ákvarðanir um byggingu hennar voru teknar og þegar gengi krónunnar var sem veikast í fyrra, er um 80 milljónir. Ljóst sé því að það skipti sveitarfélagið miklu máli eigi  Fasteign rétt á leiðréttingu gengistryggðra lána. Ljóst sé einnig að fáist slíkar leiðréttingar hafi þær umtalsverð áhrif á upphæð núvirtrar skuldbindingar sveitarfélagsins og þar með skuldastöðu þess og gætu því breytt öllum þeim forsendum sem unnið er útfrá varðandi skuldastöðu og sameiningarviðræður í dag.