Fallist Eftirlitsstofnun EFTA ekki á rök Íslands í EFTA-málinu kann málið á endanum að fara fyrir EFTA-dómstólinn. Gera má ráð fyrir að niðurstaða hans gæti legið fyrir eftir um eitt og hálft ár.

Eftirlitsstofnun EFTA, ESA, sendi í lok maí áminningarbréf til íslenskra stjórnvalda en í því kom fram að niðurstaða ESA væri sú að Ísland væri skuldbundið til að greiða lágmarkstryggingu til þeirrra sem áttu innistæður á Icesave-reikningunum í Bretlandi og Hollandi. Íslensk stjórnvöld hafa tveggja mánaða frest til að svara áminningarbréfinu.

Verði svar Íslands við áminningarbréfinu ekki til að breyta áliti ESA mun ESA gefa út svokallað rökstutt álit. Í slíku áliti er nánar gerð grein fyrir niðurstöðu stofnunarinnar og þeim lagarökum sem hún byggir á, að sögn Högna Kristjánssonar, skrifstofustjóra í utanríkisráðuneytinu. Ísland fái tveggja mánaða frest til að svara rökstudda álitinu en fallist ESA ekki á þau geti ESA vísað málinu til EFTA-dómstólsins.

Samningsbrotamál ættu að jafnaði að vera komin fyrir EFTA-dómstólinn innan árs frá því að til þeirra er stofnað af hálfu ESA. Málsmeðferð fyrir dómstólnum tekur að meðaltali eitt ár, en gæti gengið greiðar fyrir sig, allt eftir umfangi mála, að þvíæ er fram kemur í Morgunblaðinu í dag.