Tilbúið til viðræðna um kosti sameiningar

Borgarráð samþykkti á fundi sínum í morgun að kannaðir verði kostir sameiningar sveitarfélaganna og lýsir sig tilbúið til viðræðna við bæjarstjórn Álftaness.

Fram kemur í tilkynningu frá borgaryfirvöldum að í skoðanakönnun um vilja Álftnesinga til sameiningar sem haldin hafi verið þann 6. mars sl. hafi komið fram að flestir íbúar vilji sameinast Garðabæ eða Reykjavík. Í framhaldi af því hafi bæjarstjórn Álftaness óskað eftir viðræðum við fulltrúa Reykjavíkurborgar um vilja og mögulega hagræðingu af sameiningu við Reykjavík.

„Í samstarfssamningi Samfylkingar og Besta flokksins er lögð áhersla á að Reykjavík taki forystu í umræðum um nánari samvinnu og sameiningu sveitarfélaga á höfuðborgarsvæðinu. Sameining Reykjavíkur og Álftaness gæti verið fyrsta skrefið í átt að markvissari og nánari samvinnu og sameiningu sveitarfélaga á höfuðborgarsvæðinu. Í þeirri sýn felst jafnframt að sjálfstæði hverfa í ákvörðunum, þjónustu og rekstri verði aukið,“ segir í tilkynningu.

„Það er mér mikið að skapi að tala við sem flesta og að allir séu glaðir,“ er haft eftir Jóni Gnarr, borgarstjóra Reykjavíkur.

• 3 blogg um fréttina

Bloggað um fréttina

• Haraldur Haraldsson: Tilbúið til viðræðna um kosti sameiningar//Arfavittlaus hugmyndi eins og allt …
• Guðrún Þóra Hjaltadóttir: Nei takk !
• Bogi Jónsson: Hlið á Álftanes