Neytendasamtökin segja eftirá skýringar duga skammt Ómar Óskarsson

„Í ljósi þess að bankinn ætlar ekki að aðhafast meira er ein leið lántakenda að leita til dómstóla,“ segir Brynhildur Pétursdóttir, fulltrúi hjá Neytendasamtökunum en lántakendur hjá Arion banka hafa ekki fengið neina leiðréttingu eftir að áfrýjunarnefnd neytendamála úrskurðaði í janúar að bankinn hefði brotið gegn lögum um neytendalán.

Í frétt á heimasíðu Neytendasamtakanna segir að þar sem frestur bankans til að skjóta úrskurðinum til dómstóla sé liðinn sé augljóst að bankinn ætli ekki lengra með málið.

Arion banki uni þar með niðurstöðunni og viðskiptavinir bankans hljóti því að eiga rétt á endurgreiðslu ofgreiddra vaxta og að vextir verði færðir í upphaflegt horf.

Hins vegar komi viðbrögð bankans á óvart, þeir viðskiptavinir sem tekið hafi gengistryggð lán hafi einungis fengið bréf frá bankanum í mars þar sem vaxtasamsetningin á lánum er útskýrð nánar.

„Virðist bankinn túlka ákvörðun Neytendastofu á þá leið að einungis hafi verið um smávægilegan misskilning á ferð sem rétt sé að leiðrétta og upplýsa viðskiptavini um.  Að öðru leyti lætur bankinn eins og ekkert hafi í skorist og hann hafi engin lög brotið og því sé engrar leiðréttingar þörf.“

Þá kemur fram í fréttinni að Neytendasamtökin þekki engin önnur dæmi þess að lánastofnanir sendi viðskiptavinum slíkar útskýringar löngu eftir að skrifaði hafi verið undir lánasamning.

Forsaga málsins er sú að í ágúst í fyrra fengu Neytendasamtökin nokkur mál inn á borð til sín vegna myntkörfulána Kaupþings og eftir að hafa skoðað málin tóku samtökin undir athugasemdirnar og sendu þau til Neytendastofu, sem hefur eftirlit með lögum um neytendalán.

Neytendastofa komst að þeirri niðurstöðu að bankinn hefði brotið gegn lögum, Kaupþing áfrýjaði niðurstöðunni til áfrýjunarnefndar neytendamála sem staðfesti niðurstöðu Neytendastofu.

Fréttin á heimasíðu Neytendasamtakanna