Þórhildur Líndal er verkefnisstjóri eineltisrannsóknarinnar Úr myndasafni

Styrkur úr styrktarsjóði Margaret og Bent Scheving Thorsteinssonar var afhentur við hátíðlega athöfn í Norræna húsinu í gær. Styrkurinn, 2,2 milljónir króna, var veittur til rannsóknar á einelti gegn börnum á Íslandi.

Um er að ræða heildstæða, þverfræðilega rannsókn með það að markmiði að greina þekkingu á tíðni eineltis, viðbrögð við því og lagaúrræði þegar um einelti er að ræða. 

Skoðuð verður skilgreining á einelti í lögum og stjórnvaldsfyrirmælum, innan sem utan skólakerfisins og í félagslegri þjónustu við börn. Þá verður rannsakað hvort viðbrögð við einelti séu samræmd af hálfu þeirra sem vinna með börnum.

Rannsókninni er ætlað að efla sérfræðiþekkingu á einelti enn frekar og styrkja þannig félagsleg og lagaleg úrræði til að sporna við því.

Verkefnisstjóri rannsóknarinnar er Þórhildur Líndal, forstöðumaður Rannsóknastofnunar Ármanns Snævarr í fjölskyldumálefnum. Einnig taka Halldór S. Guðmundsson, lektor við Félagsráðgjafardeild Háskóla Íslands og Halldóra Vanda Sigurgeirsdóttir, lektor við Íþrótta-, tómstunda- og þroskaþjálfadeild HÍ, þátt í undirbúningi og umsjón rannsóknarinnar.

Rannsóknastofnun Ármanns Snævarr um fjölskyldumálefni var sett á laggirnar haustið 2009. Hún er vísindaleg rannsóknastofnun sem starfrækt er af Háskóla Íslands.

Stofnunin heyrir undir Lagadeild og er vettvangur lögfræðirannsókna og þróunarstarfs í málefnum fjölskyldna og barna, í þverfaglegu samstarfi við önnur fræðasvið og rannsóknastofnanir sem fjalla um fjölskyldumálefni.